|
|
|
Abahlabeleli bananza ezamasiko
NguNobuhle Mgwaqo
ABAHLABELELI bakoBulawayo njengabo bonke abananza ezamasiko bahloniphe iviki yeCulture Week ngokuvakatshela indawo ezigcina abantu asebekhulile koBulawayo.
Isikhulumi senhlanganiso yeBulawayo Musicians Association uAsaph Kudita, uthe inhlanganiso yabo ndawonye lenhlanganiso yeNational Arts Council bamanyene ngoLwesithathu bavakatshela e-Edith Duly eseNorth End kunye leNtembeni Old People’s Home eseLuveve.
“Sivakatshele e-Edith Duly kunye leNtembeni safika sathanyela andubana sihlabelele ukuze sitshengise umlandu wethu ebantwini esihlezi labo.
“Bakholisile sibili abadala esibavakatsheleyo, bebegida ndawonye lathi kube mnandi sibili,” nguKudita lowo.
UNkosikazi Precious Abraham osebenza e-Edith Duly oxoxe loMthunywa uthe bajabule kakhulu ukuvakatshelwa ngabahlabeleli.
“Sibe lesikhathi esihle kakhulu lamhlanje (ngoLwesithathu) abahlabeleli bakoBulawayo basivakatshele bafika bathanyela, bahlanza indawo yethu andubana basiculele, kugidwe kwaba luthuli, isenzo esithakazelelwe ngabadala esibakhangeleyo,” kubika uNksz Abraham.
Kusenjalo inhlanganiso yeBMA isikhethe ikomithi eyiyo ezabona ukuthi abahlabeleli bakoBulawayo bayathuthukiswa kusetshenziswa isisekelo sombuso abasibumbayo.
Umgcinisihlalo wale ikomithi nguKhuxman, esekelwa nguVusa Ndlovu oweSibali Entertainment, unobhala walikomithi nguCharity Mpala esekelwa nguGabriel Nyandoro. U-Enerst Masongela ngumgciningcebo, uAsaph Kudita eyisikhulumi sekomithi le. Ilunga lekomithi elikhangela inhlelo zeBMA nguJoel Mutali, uWitness Ncube ke yena ngobona ngemkhosi yokudinga imali, kuthi uSani Kenge nguye obona ngempilakahle yabahlabeleli.
Ijongo yekomithi yabahlabeleli yikuthi bathuthukise njalo bananzelele izifiso zabahlabeleli bakoBulawayo.
“Injongo yethu emqoka yikuthi sibone ukuthi abahlabeleli bakoBulawayo bayasukunyiswa, babonakale njalo ukuthi bale-professionalism.
“Sidinga ukuthi umculo wethu utshaywe emagagasini ikakhulu awePowerFM ukuze abantu bazi umculo wethu,” nguKudita lowo.
Uthe njengenhlanganiso kunye leyeNational Arts Council bazabona ukuthi akulamhlabeleli ozavela ngaphandle kwakoBulawayo ozavunyelwa ukuthi atshaye kungela ngitsho umhlabeleli oyedwa wakoBulawayo.
“Ngikhuluma ngisenzenje khathesi kulefestival eyenziwa yi-International Organisation for Migration ezakwenziwa lapha kodwa akula ngitsho lomhlabeleli oyedwa kumbe ngithi mina kuzabe kulabahlabeleli abalutshwana bakoBulawayo,” nguKudita lowo. |
|
|