|
|
|
Seziphephela emuthini wokukhwehlela indlamanzi
NguNobuhle Mgwaqo
NGENXA yokudula kotshwala kunye lokuvalwa kwamanye amabhawa yinkampani ye-Ingwebu, indlamanzi kubikwa seziphephela emuthini wokukhwehlela okuthiwa yi”Hestalix D.”
Umuntu engawunatha uyadakwa ukwedlula lowo onathe iwothi.
Iphephandaba likazulu livakatshele emavinkilini akoMunyoro eNkulumane, laxoxa lezinye indlamanzi lezwa ukuthi inengi labasakhulayo seliphephela kulumuthi. Sebewunike legama elithi, “Ngoma.”
Umuntu nxa enathe umuthi lo umthola egiqika phansi ingani usefikelwe, kanti hatshi yikudakwa. Kubikwa umuthi lo udume kakhulu kubowindi abayabe befuna ukudakwa bazikhohlwe ngesikhathi esifitshane njalo bengasebenzisanga imali enengi.
Omunye wabanatha umuthi lo othande ukubizwa ngokuthi nguHadebe nje kuphela, uthe umuthi lo ulamandla esabekayo.
“I-Hestalix imnandi lasemlonyeni njalo idaka ukwedlula iwothi ngokwayo okwenza umuntu adakwe engasebenzisanga imali enengi njengoba nje ubona lawe ukuthi imali le inzima ukutholakala,” kutsho lowo Hadebe.
Uqhubekele phambili wathi bande ukuthengiselwa umuthi lo ngamajaha abuya evela eMzilikazi.
Ngemva kokuchwayisisa uMthunywa uthole ukuthi bakhona njalo abantu abawuthengisa eNtumbane, emikotweni khonapha edolobheni, ematshabhini kunye lakwamanye amabhawa kodwa kubikwa abantu laba kabathengiseli yiloba ngubani ngoba besesaba ukuthi bengacina bethengisela amapholisa.
Umuthi lo uthengiswa nge-30 rand nje kuphela imbodlela engaba yi-50ml.
Umuthi weHestalix ngenxa yokusetshenziswa ngendlela engaqondanga ngabantu kubikwa kawusathengiselwa yiloba ngubani emaChemist, ngaphandle kokuthi nxa umuntu ebhalelwe ngudokotela ukuthi awuthengiselwe.
Omunye udokotela oxoxe loMthunywa ngomuthi lo, uthe ngowokukhwehlela kodwa uyadaka.
“I-Hestalix ngumuthi wokukhwehlela kodwa uyadaka ngenxa yokuthi ungena kuluhlu lwezidakamizwa ezifana labo cocaine kungakho kawuvunyelwa ukuthi unathwe mahlayana nje,” kutsho lowo dokotela.
Ngomnyaka ophelileyo, iphephandaba likazulu lakhupha udaba ngotshwala beZambia obabuthengiselwa emaphetshaneni okwakuthiwa yiDouble punch.
Utshwala lobu babusenza umuntu obunathayo avuvuke ikhanda abengokunye. |
|
|