|
|
|
Kuqakathekile ukuzwa isimo sikaNkulunkulu
NguMehluli Majoni
KUHLE ukuhlangana lani bathandekayo kuyonale iviki sixoxisana ngelizwi leNkosi yethu uJesu Khristu owasifela esiphambanweni.
Ngizizwa ngilokujabula okukhulu ukuxoxisana lani sikhulisana ekwazini uNkulunkulu ngcono.
Phezu kwalokhu ngithanda ukulibonga lonke ngosekelo lwenu, ngithi iNkosi ilibusise kakhulu.
Kuviki eliphelileyo sike sakhuluma ngendlela zokukhula ekukholweni kwethu njengamaKhristu. Lamhlanje ngifisa ukuthinta indaba yokholo ngigxile kakhulu ukwazi isimo sikaNkulunkulu.
Ekuxoxeni kwethu lamhlanje sizakhangela imicijo emine ezasiphathisa ukwazi isimo sikaNkulunkulu ngcono.
Okwakuqala isimo sikaNkulunkulu singabasazi ngcono ngokuhlala sithandaza.
Nxa sithandaza sikhulisa ubudlelwano bethu lobaba uNkulunkulu njalo siba lokuzwisisa isimo sakhe.
Nxa sithandaza ngokukholwa singathandabuzi, uNkulunkulu uyaphendula imithandazo yethu ngasosonke isikhathi njalo uyasithethelela izono zethu.
Ngelinye ilanga uNkulunkulu ekhuluma loMose emthandazweni uthi, “Nginguye lowo onguye”, okutsho ukuthi uNkulunkulu uyikho konke empilweni zethu.
Umcijo wesibili uphathelane lobudlelwane obuhle loNkulunkulu, Daniel 11vs 32.
Nxa sikholwa njalo sikhuleka kuNkulunkulu ubudlelwano bethu laye buyakhula okwesibanga esikhulu njalo akulalutho olungasikhipha kuthando lwakhe.
Ngobubi obukhona emhlabeni kulezinsuku ngileqiniso lokuthi kudingakala abantu abalokholo oluqinileyo abazakuma lanxa izivunguzane zesitha esinguSathane zibahlasela.
Umcijo wesithathu yikuba leqiniso enhliziyweni yakho nxa ukholwa kuNkulunkulu. Ukukholwa uthandabuza kufana lokuthi uyazikhohlisa mzalwane, kufana lamanzi lamafutha akungeke kwahlangana.
UNkulunkulu kuAmanani 23vs 9 uthi, “UNkulunkulu akaqambi manga, njalo akaguquli izithembiso zakhe.”
Nxa uNkulunkulu esimkhonzayo egcina izithembiso zakhe ngokufanayo lathi kumele sethembeke ngasosonke isikhathi simkhonze ngokupheleleyo.
Umcijo wokucina uphathelane lokubala lokuzwisisa ilizwi likaNkulunkulu.
Ukubala lokuzwisisa ilizwi likaNkulunkulu kuletha ukuzwisisa ngcono isimo sikaNkulunkulu.
Ngamanye amazwi bazalwane ilizwi likaNkulunkulu yisisekelo sokwazi uNkulunkulu njalo lokukhula ekukholweni kwethu.
Ngakho ngithanda ukulikhuthaza ukuthi sibe lomfutho wokubala ibhayibhili ukuze sazi izithembiso zikaNkulunkulu mayelana lempilo zethu.
Kumaviki adluleyo ngathi uNkulunkulu wasidala ukuthi sibelelungile lokukhetha lokhu esikufunayo empilweni zethu.
Nxa singahlala sibala ilizwi lakhe sithandaza kuye ngileqiniso lokuthi izithembiso lesimo kuzakuba phezu kwethu.
Asihlanganeni kuviki elizayo bazalwane ngikholwa ukuthi lizaqhubekela phambili libala ilizwi likaNkulunkulu lisibamazi ngcono.
Nxa ulombuzo kumbe umbono ungawuthumeza ku-mehlulimajoni@gmail.com kumbe ku-0912582483/888871. |
|
|