|
|
|
Sebethengisa izifuyo ngenxa yendlala
YiNtatheli kaMthunywa
ABALIMI abavela esabelweni seMatabeleland South sebeqalisile ukuthengisa izifuyo ngokudla kulandela indlala esibhahile kulumango.
Nyakenye isabelo lesi sithole izulu elincane kakhulu okubangele ukutsha kwezilimo kunye lamadlelo ngenxa yokutshisa kakhulu kwelanga.
Esigabeni seKezi, eziqintini ezibalisela iRatanyane kunye leMaphisa kubikwa abanye abalimi sebeqalisile ukuthengisa inkomo zabo ngokudla.
Esinye isakhamuzi esikhulume lephephandaba likazulu uNkosikazi Sibonokuhle Ncube odabuka esiqintini seMaphisa uveze ukuba sebethengisa izifuyo ngemali ephansi ukuze bathole imali yokuthenga ukudla.
“Inkomo eyodwa siyithengisa ngemali engange-1 000 randi kuthi imbuzi siyithengise nge-100 randi.
“Lonyaka indlala ibambile kulumhlubulo ngenxa yokungani kuhle kwezulu ngomnyaka ophelileyo.
“Abanye abalimi sebethengisa imbuzi eyodwa nge-20kg yempuphu kuthi abanye bathengise inkomo ngamasaka amabili omumbu,” kulandisa uNkz Ncube.
Ngomnyaka ka-2008 abalimi abanengi bakulindawo balahlekelwa yizifuyo ezinengi ngenxa yokuswela amadlelo amahle.
Omunye umlimi ovela esiqintini seRatanyane uMnumzana Mluleki Ndlovu ukhalaze kuHulumende ukuba abaphathise ngokudla.
“Abantu bazaphelelwa yizifuyo nxa uHulumende kumbe inhlanganiso ezizimele zodwa zingasabanikanga ukudla.
“Abanye abalimi bebezama ukusisela inkomo zabo emapulazini amakhulu kodwa abanikazi bayala lamadlelo abo. Abantu sebeswele ukuthi baphephele ngaphi lokhe simelele ukuthi mhlawumbe uHulumende engasinceda,” kutsho uMnu Ndlovu.
Kunhlolisiso eyaqhutshwa lugatsha lwezokulima lonyaka isabelo seMat South ngesinye sezabelo esikhangelelwe ukubhekana lendlala enkulu kulandela ukungani kuhle kwezulu.
Ngemva kwenhlolisiso le enye ingcitshi kwezokufuya inkomo esabelweni lesi uDokotela Msongelwa Mangena wakhuthaza abalimi ukuthi bathengise ingxenye yezifuyo zabo ukuze zingahlaselwa yindlala. |
|
|