|
|
|
Ukuvikela amatamatisi emqandweni
NguMehluli Majoni
ZINENGI indlela abalimi abangazisebenzisa ekuvikeleni amatamatisi ekuhlaselweni ngumqando.
Abalimi balakho ukusebenzisa utshani, amanzi kumbe amaphepha e-pulasitiki ekuvikeleni izilimo zabo ekutshazweni ngumqando.
Ngesikhathi sebusika izilimo ezinengi zijwayele ukuhlaselwa ngumqando obizwa ngokuthi yi-black frost kumbe iwhite frost.
Izilimo ezihlaselwa ngumqando lo ziyoma amahlamvu kunye lengatsha ziwele phansi.
Ekhuluma lephephandaba likazulu omunye umlimisi osebenza kugatsha lweAgritex uMnumzana Alpha Ndlovu uthe kuqakathekile ukuthi abalimi baqalise khathesi ukuvikela izilimo zabo kumtshazo.
UMnu Ndlovu uveze ukuba abalimi bangakwenza lokhu ngokugombolozela izivande zabo ngocingo bafake utshani lamaphepha amnyama.
“Utshani buqakathekile kakhulu ekuvikeleni amatamatisi ukuthi engatshazwa ngumqando ngesikhathi lesi.
“Utshani lamaphepha amnyama kuyaphathisa ukubamba umqando ongahlasela izilimo.
“Ngemva kokugombolezela izivande ngotshani kumbe ngamaphepha amnyama, umlimi kumele asekele izilimo zakhe ngezigodo ukuze zikhule kuhle,” kuchaza uMnumzana Nldlovu.
Ngaphandle kokusebenzisa amaphepha lotshani abalimi balakho ukubasa umlilo olentuthu enengi duzane lezivande zabo ukuze behlise amathuba okutshazwa kwezilimo zabo. Umlilo lo obizwa ngokuthi yi-smoke pocket uphathisa kakhulu izilimo ekuncibilikiseni ungqwaqwane oyabe usemahlamvini ezilimo.
Abalimi abasendaweni ezehlileyo kuqakathekile ukuthi babase umlilo lo emathathakusa.
UMnu Ndlovu wengeze ngokuthi abalimi balakho njalo ukuvikela izilimo zabo ekuhlaselweni ngumqando ngozikuthelezela.
“Abalimi abakhulu abalima ngokuthelezela balakho ukuvikela izilimo zabo ekuhlaselweni ngumqando ngokusebenzisa i-drip irrigation.
“Nxa abalimi bethelezela izilimo zabo kumele bazithelezele ekuseni kakhulu ukuze behlise amathuba okutshazwa kwezilimo zabo.
“Ukuthelela lokhu kuphathisa kakhulu amahlamvu kunye lengatsha ekutshazweni ngumqando,” kuchasisa uMnu Ndlovu.
Uphethe ngokuxwayisa abalimi ukuthi badinge imithi yokubulala izinanakazana ezifana le-red spider mite kunye le-early blight ezihlasela kakhulu amatamatisi ngesikhathi sebusika. |
|
|