|
|
|
Kanti kutheni kuHighlanders lonyaka?
Umbono
IQEMBU leHighlanders lihlonipheka kumphakathi wakoBulawayo jikelele laselizweni leZimbabwe lonke.
Liligugu kakhulu okokuthi abanye abantu bathola ubuBulawayo babo ekuziqhenyeni ngeqembu leli.
Isehlakalo esiphume kuphephandaba leChronicle elamhlaka 20 Nkwenkwezi esokuthi abadlali beqembu leli ababekhalale umsebenzi babuthane endlini yomunye umdlali osowatshiya leliqembu osedlala emazweni bankunkuluza amanzi amponjwana okwedlulise amalawulo siyanenkisa okungaphezulu kwamazwi okusichaza.
Kukhanyile kubo bonke abantu ukuthi kulomkhonyovu osungene kumuli yeBosso lonyaka. Kuvelile sobala ukuthi kulenhlavana ephehla inhlanyelo yeqembu lelizwe lonke.
Kukhona okungumkhutshana osukuhluma kubadlali beqembu likaMthwakazi okulakho ukuletha ukugugudeka kwegugu likaBulawayo. Uzulu wonke ubambe owangaphansi ezibuza njalonjalo ukuthi, kutheni kanti kwezikamaGebhula?
Isigameko sensindabaphenduli le silandela esinye laso lapho abadlali baleliqembu bekhalale umsebenzi okwesibili lonyaka.
Kodwa okusuka kudanise abalandeli beqembu yikuthi kuzigameko zombili amabizo abadlali abadala kuleliqembu yiwo aqanjwayo.
Thina abakazulu sikhangelele ukuthi abadlali laba kube yibo abaletha umzekeliso omuhle okumele ulandelwe ngabadlali abatsha abasakhasela eziko kwezemidlalo yebhola.
Lokhu kucina kuletha engqondweni insolo yokuthi kanti vele iBosso yababizelani futhi lababadlali njengoba basebetshiye iqembu leli.
Sesibona sengathi yibo abaletha okuyimkhutshana okungaqedakaliyo abahamba bekudobha lapha lalaphaya njengoba bengabantu abangahlali ndawonye.
Kuzwisa ubuhlungu ukuthi konke lokhu kwenzakala ngesikhathi iBosso ibhekane lenkinga yokuswela inhlanhla yokunqoba. Abalandeli abanengi bayangunguna ngokuthi kanti abadlali abadala laba nguquko bani abayilethayo kuqembu leli. Okwamanje akusiyo inguquko efunwa liqembu leli.
IHighlanders ingangcono ihlale ingelabo labo badlali nxa kuyikuthi yibo abahlanyela ubuqholo lokuklolodela inkokheli yeqembu leli.
Abakhokheli beqembu bakhethwa ngabalandeli beqembu leli ngakho oklolodela abakhokheli laba uklolodela abalandeli beqembu.
Ngokufanayo oklolodela abalandeli ngoklolodela umqhatshi wakhe. Ngakho akusweleki ukuthi adlalele iqembu leli.
Isikhathi sesifikile sokuthi inkokheli yeqembu leli itshaye phansi isiphune indelelo esingene kuqembu.
IHighlanders ngeke ibiselwe muva ngabadlali abalihlekana abangalethi nzuzo kuqembu leli. Leli liqembu uBulawayo aziqhenya ngalo. Lilifa eselidluliselwe kuzizukulwana okweminyaka edlula amatshumi ayisitshiyangalombili.
Simelele umgcinisihlalo uThemba Ndlela labasekeli bakhe ukuthi bachwayisise baphenye udaba lolu ngokupheleleyo njalo abazakuthola bakwethulele uzulu ngesiphangiphangi. |
|
|