uMthunywa
INOMBELE yahlala esiqongweni se-Absa Premiership i-Orlando Pirates eyenze engakujwayelanga ngesikhathi itshayela ekhaya iPolokwane City emdlalweni we-Absa Premiership.
Kulumdlalo uMilutin Sredojevic opheka iBucs ufeze isethembiso sakhe ngabadlali bakhe abebengakalitholi ijesi kusukela isizini iqalile.
Lumqeqetshi uthembise ngeledluleyo ukuthi bazabonakala bonke laba abadlali abafike bethwelwe ngeqoma kodwa lutho ukuthola imizuzu enkundleni.
Lumdlalo iBucs iwuqale ngoMabokgwane ongalaziyo ijesi ikanti phambi kwakhe bekukhona uMarcelo da Silva waseBrazil, Asavela Mbekile obengakaze aligqoke eleZimnyama kusukela esayine kuzo esuka kuMamelodi Sundowns loLinda Mntambo.
UThabo Qalinge loPaseka Mako, abajwayele ukuqala ebhentshini, basuke lawo phansi lumdlalo obekwenza kubonakale kuhlandla lakuqala ukuthi iPirates ayiyona le ejwayelekileyo.
Kulumdlalo kubonakale loMpho Makola eqala umdlalo kanti ungomunye walaba abadlali abalizwa ngendaba ijesi kusukela kuqale isizini.
Ngasemaphethelweni ehlandla lakuqala iPirates ibisikhombisa impawu zokuhlangana, kuvela lamathuba kuJustin Shonga kodwa engawasebenzisi ngendlela.
Okucacileyo kuBucs yikuthi isijwayele ukudlala ngoXola Mlambo ohlanganisa yonke into loVincent Pule okunguye ozihola phambili ngamabhola kuBucs.
Ngemuva kokubhudubezana izikhawu emvuleni kuhlandla lesibili, uMarcelo ubingelele abalandeli beBucs ngebhola lakhe lokuqala ngomzuzu ka-59.
Bekumele iqede iPirates ngoka-61 lapho uThembinkosi Lorch elibeke eceleni esekwenze konke kade ethole iphasi kuThabiso Kutumela obesanda kungena.
Ucine ebasulile abalandeli bePirates izinyembezi uShonga ngomzuzu ka-66 ejikijela umvema weshoti okade uyi-freekick wasala enkemile unozinti wePolokwane uChigova.
Ulivalile ihlazo lePolokwane u-Ayanda Nkili ngomzuzu wokucina.
IBucs izobhekana leMamelodi Sundowns emdlalweni weligi obhekwe ngabomvu enkundleni yeLoftus Stadium, ePitoli, ngoMgqibelo ngo-3.30 ntambama. — Ubulembu
