uMthunywa
YiNatheli kaMthunywa
IKHANSILI yakoBulawayo isikhiphe umbiko wokuba izaqala ukuvala amanzi emalokitshini wonke ngenhloso yokulondoloza amanzi asedamu leMzingwane.
Amanzi aqalise ukuvalwa ngoLwesithathu (izolo) njalo azabe ehamba okwamahola angu-36 ngeviki.
Kubikwa amanzi azabe ehamba ngo-07.30 ekuseni ayephenduka ngelanga elilandelayo ngo-19.30 ntambama.
NgoMvulo kusiya ngoLwesibili amalokitshi abalisa iNkulumane, Nketa, Sizinda, Tshabalala, Cowdray Park, Emakhandeni, Gwabalanda, Maplanka, Babourfields, Mzilikazi, Nguboyenja kanye leMakokoba yiwo ayabe engelamanzi.
NgoLwesithathu amalokitshi avalelwa amanzi agoqela iMganwini, Pumula, Nketa 9, Luveve, Magwegwe, Njube, Entumbane, Mpopoma, Lobengula, Mabutweni, Iminyela, Pelandaba kanye leMatshobane.
La wona avulelwa amanzi ngoLwesine ntambama. Kumbiko lo kuvezwe ukuthi imbangela yokuhamba kwamanzi yikwehla kwamanzi edamu leMzingwane kanye lamanye lapho okudonswa khona amanzi akoBulawayo.
Isikhulumi seKhansili yakoBulawayo uNkosikazi Nesisa Mpofu ubike ukuthi kulemizamo ezakwenziwa yokutholisa abantu amanzi.
“Kuzabe kulezimota zamatanka amanzi ezizabe zithela kumalokitshi lawo ayabe engabuyanga khona amanzi.
“Indawo zokusebenzela kumele zigcine amanzi ematankeni azabanceda ngesikhathi lesi sokuhamba kwamanzi. Nxa amatanka endawo zokusebenzela esephelile abekhansili bengabalethela amanzi ngentengo engaba yi-$41 i-5 cubic meter kodwa izakhamizi zizaphiwa lawo manzi mahala,” kulandisa uNkkz Mpofu.
Kubikwa ukuthi ukuvalwa kwamanzi kuzakwenziwa idolobho lonke jikelele isimo size sibe ngcono.
