uMthunywa
YiNtatheli kaMthunywa
BEKUNGASIMUNTU kulitshebetshebe likaTshangani edale lenduna uZimunya endaweni yeMutare ngeSonto emini yantambama ngeviki edluleyo abantu befuna ukuzibonela lokuzwa ngenkomo ekhulumayo.
Inkomo le ike yaba yindaba esegudwini kulesisigaba nanko phela kubikwa iyakhuluma njengomuntu ulimi lwesiSaManyika.
Kubikwa imuli yakoDora Dombo esiqintini seMambondiani eyiyo elenkomo ekhulumayo kayizange ilugxobe edale okudanise abantu akade bebuthene befuna ukuzibonela ngawabo inkomo le ekhulumayo kanye lomnikazi wayo.
Indaba le kusolelwa ukuthi yabangelwa yibuthakathi kumbe ngumuntu owagangayo wenza ukuthi inkomo le ingasakhali njengenkomo kodwa ikhulume samuntu.
Imihlola le yiyo eyabangela ukuthi induna uZimunya abize imuli le ukuthi ifike edale lakhe lenkomo yayo le okuthiwa iyakhuluma ngeSonto eledluleyo.
Induna uZimunya ngemva kokuthonisa amanye amacala ayesedale lakhe wathumela amapholisa akhe ukuthi ahambe ayebopha umnikazi wenkomo ekhulumayo.
“Kuvame ukwenzakala ukuthi abantu abazaziyo ukuthi bangabasolwa bengabuyi edale. Lokhu yikudelela okukhulu yikho nje ngithethe isinqumo sokuthi ngithumele amapholisa ami ukuthi ayembopha,” kutsho induna uZimunya.
Kulandela ukuphuma kwendaba kuphephandaba abantu abanengi bagijimela edale likaZimunya besiyazibonela mathupha inkomo le ekhuluma isiManyika.
Njengokukhuluma kukaZimunya induna edale lakhe uthe inkomo le nxa ivulelwa esibayeni lezinye yona iyatshinga ukuthi kungani bephuza ukuyivulela yona isifuna ukuphuma.
Kuthiwa nxa sibulewe liphango iyabhonga ithi isilambile iqede lapho ithi ifuna amanzi okunatha. Inkomo le itshela umalusi wayo ukuthi ayidonsele kuwaphi amadlelo lomhlambi ukwenzela ukuthi idle kuhle iphinde inathe amanzi ewakhethileyo. Yikho bekuthiwa abanikazi benkomo le babuye layo edale.
