uMthunywa
YiNtatheli kaMthunywa
UNATION Dube umqeqetshi wentshantshu zeligi iHwange, uthe ulovalo ngokuhlangana le-Talen Vision kumdlalo wokucina wenkezo ye-Landa John Nkomo Memorial.
Zombili zadibana kumidlalo yeligi ka-Division One lapho iHwange eyehluleka khona ukunqoba iTalen Vision. Lokhu yikho okwenza uDube wabutha inhlonipho kumdlalo owatshengiswa yiTalen Vision.
IHwange ingena umango iqonde enkundleni yeLuveve ngeSonto ngemva kokunqoba iZPC Hwange 3-1. Isitha sayo iTalen Vision yanqoba 3-2 phezulu kweTsholotsho.
“Ngiyayihlonipha iTalen Vision ngoba idlala inguqu uqobo. Kumidlalo yeligi yilo iqembu elasihlupha enkundleni ngaze ngavuma ukuthi liyazi umncintiswano wenguqu.
“Khathesi sihlangana kumdlalo wenkezo, ngilolonga abadlali bami ngisazi ukuthi sidibana lethimu etshisayo,” kutsho lumqeqetshi osephendukise iHwange kuligi yePSL.
Umqeqetshi weTalen Vision uMkhuphali Masuku, ekhuluma lephephandaba likazulu uthe uhlose ukuphakamisa inkezo. Ubike ukuba utshayela ihlombe abadlali bakhe ngomsebenzi asebewenzile ngokudlala kuhle kulisizini.
“Iqembu lethu lizaphumelela. Nxa singaqhubeka sidlala ngendlela esidlala ngayo kuligi, angiboni lutho olungasivimba ukuthi siyebamba inkezo yeLanda John Memorial,” kutsho uMasuku.
Inkezo le idibanisa amaqembu amane aphezulu kulogu kanobhutshuzwayo weligi ka-Division One kumhlubulo ongezansi kwelizwe. Imivuzo ihlawulelwa yinkampani yeLiqour Hub nge-$5 000.
Ithimu ezanqoba izathola i$1 300. Ezadliwa ku-final ibuyela ekhaya le-$600 kuthi ezokucina ezimbili zinikezwe i$300.
Abadlali be-Talen Vision bavule amehlo bekhangele umvuzo wakuqala.
Ngempelaviki ezayo, kukhangelelwe ukuthi abadlali beHwange, iTsholotsho leTalen Vision bakhethwe ngobunengi babo kulabo abazanikezwa imivuzo kumkhosi weZimbabwe Football Association.
Umkhosi lo usekelwa yiLiquor Hub njalo uzaqhutshelwa kuBulawayo.
