Injiva zeNkayi ziphakamisa inguqu

28 Aug, 2015 - 15:08 0 Views

uMthunywa

Cornelius Luphahla
IZAKHAMIZI zeNkayi sezifake isinqumo sokuthi kube leqembu lenguqu lakulindawo elizadlala kumaligi aphakemeyo koBulawayo ngenjongo yokuthuthukisa ithalenta kwabasakhulayo.

UMthunywa uzwe ukuba sekuqoqwe imincintiswano yokuthi kudingwe abafana abalakho ukuyancintisana lethalenta elisedolobheni kusukela ngomnyaka ozayo.

Ngempelaviki edluleyo, iphephandaba likazulu livakatshele esiqintini seManomano lapho obekulomncintiswano womdlalo wenkezo yenguqu oweGegane-Mdawini Trophy.

Umncintiswano lo ubuqoqwe nguJosiah Ndlovu lo Precious Sibanda okuyibo abahlawuleli benkezo le.

Amaqembu alitshumi lane adibane kusukela ngoLwesihlanu kwaze kwadlalwa i-final ngeSonto.

Ithimu yeMkalathi FC ibeyintshantshu njalo ithole umvuzo wekhithi, amabhola kanye lenkezo.

Abafana beOrlando FC kusele kancane ukuthi banqobe linkezo kodwa baqede bekunombolo yesibili. Amaqembu e-Phaswane FC  kanye leManomano FC alandele kunombolo yesithathu leyesine.

Labadlali abenze kuhle babongwe ngemvuzo.Abadlali laba kube nguMusawenkosi Moyo okuqembu leManomano FC odlale ukwedlula bonke.

Umdlali ohlohle amabhola amanengi nguMzwakhe Nkomazana oweqembu leHome Sweepers FC, kwathi kubonozinti odlule bonke kube nguGift Ndlovu oweManomano.

Omunye wabahlawuleli bomncintiswano uNdlovu ubikele uMthunywa ukuthi imidlalo le isileminyaka emithathu iqhutshwa.

“Umncintiswano wokuthola inkezo le sesileminyaka emithathu sawuqala ngakho lonyaka kutshengisa ukuthi sithuthukile ngoba amaqembu la semanengi okwedlula ekuqaleni.Khathesi sikhangelele ukubumba iqembu elikhulu elizancintisana lamaqembu amakhulu akuleli.

“Sinanzelele ukuthi banengi abantu abalesiphiwo sokudlala inguqu kule indawo ngakho silethemba lokuthi sizenelisa ukubumba iqembu elikhulu lenguqu lapha,” kutsho uNdlovu.

UMthunywa ubuye wakhuluma lo Sibanda ochaze ukuba bakhangelele ukuthuthukisa isigaba sakibo ngenguqu kanye lokuveza iziphiwo abalazo.

“Sikhangelele ukuthuthukisa isigaba sakithi ngenguqu kanye lokuveza iziphiwo zabadlali benguqu esilabo. Sifisa ukuthi abadlali abaleziphiwo ezedlula ezabanye nxa kukhona amaqembu abafunayo abathathe ukuze bathuthuke emdlalweni wenguqu.

“Okunye njalo sifisa ukuthi sithole uncedo ukuze senelise lathi ukuyancintisana lamanye amaqembu enguqu koBulawayo.”

 

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds