Injiva itshontshelwa i-40 litres ye-cooking oil isebunandini

Injiva itshontshelwa i-40 litres ye-cooking oil isebunandini

0 343

Bongani Ndlovu

KULENJIVA yelokitshini leCowdray Park koBulawayo esele ingelankani kulandela ukugqekeza kwamasela emzini wakhe atshontsha amafutha okupheka wodwa yona isebunandini.

UMnunzana Thamsanqa Phiri oyinjiva usele ebambe owangaphansi  ngeSonto ekuseni lapho athe engena endlini yakhe wathola i-40 litres yamafutha okupheka etshontshiwe. 

Iphephandaba likazulu likhulumisane loMnu Phiri olandise ngesehlakalo lesi.

“Kuliqiniso ukuthi endlini yami kugqekeziwe ngoMgqibelo ebusuku. Ngikhohlwe ukuvala  i-security door ngiphuma labangane bami sisiyajabula edolobheni. 

“Ekuphendukeni kwami ngeSonto ekuseni ngathola i-40 litres yamafutha okupheka ingasekho. Okube yisimanga yikuthi umuntu ogqekezileyo uthethe amafutha kuphela,” kulandisa uMnu uPhiri.

Uqhubekele phambili esithi ucabangela ukuthi umuntu otshontshileyo kungabe kungumuntu ololwazi ngokusendlini yakhe ngoba uthethe amafutha wodwa.

“Umuntu owenze lokhu ngololwazi ngokuphakathi endlini njalo ngodubo olukhona lwamafutha okuphekisa elizweni ujonge ukuyakwenza imali ngawo. 

“Ngibike udaba lolu emapholiseni azama ukuthi abhode ehlola ezindlini zabantu esibacabangelayo eziseduze kodwa abatholanga lutho,” kulandisa uMnu Phiri. 

Omunye wabomakhelwane ongazange athande ukuqanjwa ngegama ubike ukuthi isimo selizwe yiso esibangele ukuthi uPhiri alahlekelwe ngamafutha akhe.

“Njengoba kulikhefu lokukholisa uPhiri ubeyezikholisela, umkakhe labantwana basekhaya ngakho lumuntu uhle wabona kulithuba elihle lokutshontsha.

“Ukudula kwempahla etshiyeneyo yikho okwenze umuntu lo azibonele inkalakatha yemali ngoba kusobala ukuthi sesiyawathengisa,” kuphetha umakhelwane lo.

Isikhulumi samapholisa akoBulawayo uChief Inspector Precious Simango uthe indaba le kayikafiki endlebeni zakhe.

“Indaba le besingakayitholi kodwa sithanda ukuxwayisa uzulu ukuthi nxa ephuma abone ukuthi uyavala ahluthulele zonke izivalo kanye lamafasitela.”

NO COMMENTS

Leave a Reply