uMthunywa
NguEmmanuel Ndlovu
KULENINA lelokitshi leMakokoba okubikwa selidlala umacatshelana lezakhamizi zakulindawo ngemva kokuhuquluza imali engange$2 448 eye-burial society, uMthunywa ukuzwile lokhu.
Lelinina elivezwe ngokuthi nguNkosazana Nokuthula Nyoni kubikwa lingumgcinisikhwama we-Sakhelene Zinini Burial Society ekuleli ilokitshi.
Amanye amalunga alinhlanganiso eyabunjwa ngomnyaka ka-2004 abikele iphephandaba leli ukuthi isisusa sodaba saqala ngoMpalakazi nyakenye ngesikhathi benquma ukuthi kukhethwe umngcinisikhwama omutsha we-burial society.
“Sathi sifuna ukukhetha u-treasurer omutsha uMaNyoni wala. Sabuya sacela ukuthi asitshengise imali esasilayo ebhukwini, kodwa waqala ukubala amabala engwe.
“Khathesi nxa sihamba endlini yakhe sisiyamdinga sithola kungelamuntu njalo omakhelwane bathi kwesinye isikhathi uyabe ezivalele phakathi, kumbe nxa ethe uyaphuma uphenduka phakathi kobusuku,” kutsho elinye ilunga lalinhlanganiso ngelokhathazekileyo.
Ubuye wathi sebaze babikela amapholisa ngemikhuba egilwa nguNkszn Nyoni.
“Sathi simtshela ukuthi sizakuyabikela amapholisa, wanklamasa wathi akulanto esingamenza yona ngoba wazana labomthetho kanye lezinye iziphathamandla eziphezulu.
“UMaNyoni sesinanzelele ukuthi ulitsotsi njalo sizwa kuthiwa wathenga isitanda elokitshini leLuveve ngomnyaka ophelileyo ngemali yethu,” kuqhubeka lelilunga.
Ngaphandle kwalokhu, kubikwa ngoLwesine lweviki edluleyo, inina leli lavinjezelwa ngabanye abazalwane belinye ibandla leMagwegwe bezokhala ngemali yabo.
Kubikwa amanina la aziwa ngokuthi ngomama bangoloLwesine njalo kuleli ibandla uNkszn Nyoni ungumngcinisikhwama.
Kuleli iviki intatheli le iphuthume yayafika endlini kaNkszn Nyoni yathola kungelamuntu.
Ibuye yazama ukuxhumana laye ecingweni lona oludojwe ngowesifazana othile oziveze ngokuthi uyindodakazi kaNkszn Nyoni.
“Umama kakho kulezinsuku, ungaphandle kwelizwe. Udaba okhuluma ngalo lami angilwazi, ngizabuya ngimbuza engaphenduka,” kutsho lo owesifazana.
