uMthunywa
Gladmore Ncube loNomthandazo Ndlovu
IMALI yimpande yesono nanko phela kulendoda elobolise umntanayo okwesibili, isizatho siyikuthi amalobolo akuqala adliwa ngomalume lapho umntanakhe akhulela khona.
UMthunywa uzwe ukuthi uMnumzana Bhekani Siziba ulobolise umntakamnewabo uNkosazana Lethiwe Siziba kabili ngoba ezondele ukuthi umkakhe uMnumzana Japhet Nkomo walobola komalume lapho uNkszn Siziba akhulela khona.
Intatheli ivakatshele eLobengula koBulawayo yakhulumisana loMnu Nkomo othe yena kalanduli ukuthi umkakhe sebhadaliswa imali yamalobolo kabili.
“Mina ngalobola uMaSiziba iminyaka emibili eyedlulayo komalumakhe lapho akhulela khona kwaba kuhle.
Khathesi sekuvele uyise omncane esasingamazi wathi ufuna imali yamalobolo ngoba umntanabo walotsholwa bona abakoSiziba bengakwazi.
“UMnu Siziba wafika kimi wathi ufuna imali yamalobolo ngoba umntanabo ngamlobola lapho angazalwanga khona. Mina ngamtshela ngathi angisoze ngafa ngabhadala imali yabo ngoba ngezake ngibhadale kabili, nxa kuyindaba yemuli kabakhulumisane bodwa.
Okubuhlungu yikuthi babhadalise umkami kabili imali okungamelanga ayibhadale ngoba ngalobola kudala kodwa sezilobola khathesi,” kuchaza uMnu Nkomo.
Intatheli ikhulumisane loMnu Siziba ngaloludaba othe yena kubuhlungu ukuthi umntwana ahambe engathi kala abamzalayo azaliswe angathi yinyamazana engalotsholwanga.
“Loba kuthiwani ngezake umntakamnewethu alotsholwe komalumakhe angathi kala abakibo yikho nje ngisithi ngifuna imali le. Isiko lethu alikuvumi lokhu.
“Umntanami ngakhuluma laye kodwa umkakhe kazwisisi yikho nje sivumelene ukuthi sizakwenza njani kodwa angisoze ngikutsho sobala ukuthi sivumelaneni,” kuchaza uMnu Siziba.
Intatheli izamile ukukhulumisana loNkszn Siziba ngaloludaba kodwa kwehlula ngoba ebengekho endlini njalo umkakhe kazange athande ukuveza inombolo zakhe zocingo.
