uMthunywa
Ungitshiye wahamba lomakhwapheni
KHULU sileminyaka emine sitshadile lomkami. Kunyanga ezintathu ezedluleyo ngithole ukuthi uselomakhwapheni. Ngathi ngimbuza, kazange angiphendule. Kumasonto ambalwa edluleyo wahamba kibo ekhaya ngoLwesihlanu esiya emsebenzini waze wabuya ngeSonto.
Kulapho afika engitshela khona ukuthi usethole umuntu amthandayo, ngakho ucela sehlukane. Ngelanga elilandelayo ngivela emsebenzini ngafica eseqoqe konke okungokwakhe, esetshaye wachitha. Ngikhathazekile engqondweni angazi lokuthi ngithatheni ngiyihlanganise lani.
IMPENDULO:
Ukwehlukana mzukulu kayisiyonto emnandi. Kodwa kukhanya angathi umkakho useqedile ngalolu daba futhi akukho okungamtshintsha ingqondo. Kayisiso isikhathi sokukhala, ungaqali ukuchitha isikhathi sakho.
Hlanganisa izimuli uzazise ngesinqumo somkakho.
Kalasikhathi semuli umkami
Ngithemba uqinile Khulu, lami ngiyaphila. Khulu kukhona okungikhathazayo. Ngilomnyaka ngendile kodwa kukhona okungangiphathiyo ngendlela umkami aziphatha ngayo. Ekuseni umkami uvukela ejimu (gym) kuthi lantambama nxa etshayisa emsebenzini udlula khona. Nsukuzonke ubuya esezolala. Lokudla, udlela endlini yethu yokulala. Akaxoxi. Uphendula lokho engimbuza khona. Akalasikhathi semuli.
IMPENDULO:
Mzukulu ngithemba uphilile, mina ngiqine ukwedlula wena lanxa sengimdala. Kuyinto enhle ukuzivocavoca.
Kuyimpilo kodwa-ke kumele uzame ukukhuluma laye ngokuhlala kwakhe engekho ngekhaya. Futhi kungaba kuhle lawe ngezinye izinsuku uke nje uhambe laye uyezivocavoca. Lokhu kuzakhulisa ubudlelwano benu njengezithandani. Hlalani phansi likhulume ngokubaluleka kokuhlela isikhathi esikhethekileyo senu lobabili.
Kuphela kawusatshongo mzukulu ukuthi selilomntwana yini lomkakho.
Ngiyintombi nto kodwa yena uthethe
Ngileminyaka engu-27, ngiyintombi nto. Ngisanda kuthandana lowesilisa engithole ukuthi utshadile emva kokuthandana laye. Ubengifihlela, ngaze ngazitholela. Ngimthanda ngenhliziyo yami yonke. Sengikulungele ngitsho lokumnika ubuntombi bami.
IMPENDULO:
Mzukulu ukuzigcina kwakho kubaluleke okunganani kuwe? Ngemva kokuzigcina isikhathi esingaka usufuna ukulahla ubuntombi bakho ngomuntu ongelakusasa laye? Ukuthi uyamthanda akutshintshi ukuthi uthethe.
Okumqoka yikuthi usukwazi ukuthi uthethe ngakho phuma kulobu ubudlelwano ngoba buzakwephula inhliziyo ekucineni. Iqiniso mzukulu ongeke ulibalekele yikuthi undoda lo ngeke atshiye umkakhe kanye labantwabakhe ukuze athathe wena. Udlala nje ngesikhathi sakho njalo ufuna ukukudlalisa lawe.
