Inhlupho zalamuhla: Umkami usengincitsha ucansi

25 Jan, 2018 - 00:01 0 Views
Inhlupho zalamuhla: Umkami usengincitsha ucansi

uMthunywa

Kondli umntanakhe

NGILOMNTWANA oyedwa ongumfana oleminyaka eyisithupha njalo lokhe wazalwayo uyise kakaze ayondle.

Sengamncenga ngakhathala. Bengike ngicabange ukuthi ngiyemenzisa i-maintenance kodwa ngiphinde ngithi akumelanga ngimbambe ngamandla ukondla umntanakhe. Usesebenza kwenye indawo, uhlupho yikuthi ngesikhathi sekhefu ufuna umntwana amvakatshele kodwa-ke mina lokhu angikujabuleli ngoba umntanami uhlala lomama wami. Kungakho sicina sesibanga umntwana ngekhefu.

Impendulo
Ilula kakhulu indaba yakho mzukulu. Ubaba womntwana uyasebenza kungakho kumele ondle umntanakhe.

Akudingi lokukhuluma ngendaba le. Kulilungelo laloba nguphi umntwana ukuthi athole ukunakekelwa akudingayo. Nxa usehluleka ukuthi likhulumisane asikho isizatho esikuvimbayo ukuthi uzame ukuthi ingane ayondle usebenzisa umthethwandaba.

Umkami usengincitsha ucansi
Sesileminyaka emithathu sitshadile lomkami. Ngiyazifela ngaye. Selomkhuba engingawuthandiyo kusukela ezinyangeni eziyisitshiyagalolunye ezedlule, useqala ukungincitsha inkonzo yasekamelweni. Usehlezi elezizatho ezehlukeneyo ezichaza ukuthi kungani singayi emacansini. Angikaze ngingathembeki lakanye nje kuye. Ngemva komtshado sasihlangana kathathu loba kane ngeviki. Kodwa khathesi kuyazithulela nje. Nxa kwenzakele siya kanye emavikini amabili, kwesinye isikhathi inyanga iyaphela.

Impendulo
Kuyajabulisa ukwazi ukuthi uyamthanda umkakho. Ukungayijabuleli inkonzo yasekamelweni ngemva kwesikhathi litshadile akusiyo nto eyethusayo. Loba kunjalo, akusiyo into okufanele uyijayele emtshadweni wakho. Kunengi okudala ukuthi umuntu wesifazane angafuni ukuya emacansini. Ukukhuluma kwenu kufanele kuhlanganise lendlela angajabulela ngayo ukuya emacansini. Xoxisanani ungalwi.

Umkami ukhanya engelandaba lami
Ngithemba uqine saka Khulu, mina ngilohlupho, ngicela ungincedise. Umkami kwezinye izikhathi ukhanya njengomuntu ongelandaba lami ngitsho. Uyanyamalala angabuyi ngekhaya nxa evela emsebenzini.

Ngingamfonela kaphenduli ucingo lwakhe. Nxa ebuya uvele angitshele ukuthi ubephelelwe li-battrey.

Kangisamthembi ngitsho ngenxa yesenzo sakhe lesi.

Impendulo
Ukutshada kuchaza ukuthi impilo yakho usuyiphila lomunye umuntu, akusekho ukuthi “mina”. Kubalulekile ukuthi umkakho akwazi lokhu. Ukungatholakali kwakhe ecingweni akutsho ukuthi ukhona akhohlisana laye eceleni, vele khona mzukulu esintwini inhlwa kayibanjwa ngekhanda. Kungakho kumele enze konke okusemandleni akhe ukuthi wenelise ukuxhumana laye kumakhalekhukhwini ngaso sonke isikhathi. Zamani ukukhuluma. ngalokhu. .mhlawumbe izinto zingaguquka.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds