Inhlupho zalamuhla: Umkami ulala ehofisini

18 Jun, 2015 - 09:06 0 Views
Inhlupho zalamuhla: Umkami ulala ehofisini

uMthunywa

NGENZENI khulu? Umkami ulala ehofisini yakhe. Uthi wenzela ukuthi avuke masinyane angaselwa emsebenzini. Ulengubo khonale emsebenzini wakhe khulu. Sengizwile ngokulala ngedwa njalo lesikhathi sesiside ngingamazi. Ngingowesifazane njalo igazi lami lilokhu lisatshisa bo.

Impendulo
Uhlupho lwakho lubonakala lumumethe impande ezinengi ezehlukeneyo sibili, okokuqala kungenzeka ukuba ihloka selibuthundu, ubaba wembethe ingubo yenhloni nje ukuba aziveze kuwe, usevala ngomsebenzi kube kanti ukusebenza akuqali ngaye sonke besisebenza izolo, sasesilahla amajogwe ngokukhula. Okwesibili kungenzeka ukuba kuledlalicatsha eselizithaphuzela uluju lwakho nje mzukulu. Okunye kungaba mhlawumbe ubalekela wena, ngesinye isikhathi alihlabeli kuhle lapha ecansini, abe esesesaba ukukutshela abone kukuhle nje ukuzihambela ethule. Konke lokhu kukupha ingqobe yokuba dingisisa kabanzi imfulo ezala lelithumba elingaka. Hlala phansi lomkakho umbonise ubuhlungu bokufulathela ingubo akhethe ukuyakudla lamanqe nje egangeni. Kungehlula libabili kuhle ukuba ulande omunye wesihlobo esiseduze kakhulu umazise ukuba ekhaya lapha imbiza kayisabekwa usufile ngephango, kungaba kuhle nxa kungowesifazana, yena uzabona ukuba akulungise njani lezinye izihlobo. Kuzalunga mzukulu, kodwa iqiniso, hatshi lesisenzo asivamanga. Labemsebenzini bathini uma umuntu elala ehofisini. Ngitsho labo ndaba zempilo kabavumi lokhu.

Umbuzo
Khulu baqinisile abadala nxa bethi umendo kawutshayelwa amathambo. Mina ngaqala ukuthandana lomkami ngomnyaka ka2013. Ngangisesengumntwana wesikolo. Ngacina ngimitha ngabalomntwana ongumfana. Abangakithi bangixotsha ngekhaya bethi ngiyohlala lalo onginike umthwalo. Eqinisweni ngangingakazimiseli ukwenda kodwa ngahamba ngayahlala laye. Wahamba ngakithi wayavela kwabakuhle kwabanjalo. Kodwa sithe sesihlale sonke isikhathi eside kasalali lami. Kakhulumi lami ngaphandle nxa efuna ulutho kimi. Kathengi kudla, kwezinye izikhathi sicina sisiyakudla komakhelwane. Sengicabanga ukubuyela ngakithi ngoba ngeke ngithi ngilendoda.

Impendulo
Vele wena ngesintu kawendanga uhlezi lapho owaxotshelwa khona ngoba kwasokulohlupho oluthile okwaso kumele lulungiswe. Kuyadingakala ukuba ubonisane losodombo wenu ngohlupho lwakho, ungabalakho ukubonisana lezihlobo zakwenuzala eziseduze ukuze zanelise ukukhuluma lomkakho. Nxa kulokhu kusala ukulunga ngemva kokukhulumisana ungaba lakho ukuba ucele usodombo akubisele ngakini njalo afike azitsho zonke izizatho ezikubophise impahla zakho waze watshiya umendo. Kuyadingeka ke mzukulu ukuba wembathe ijazi lokubekezela kulesisikhathi esinzima kangaka empilweni yakho.

Umbuzo
Umkami uhlala ekhala ngokuthi ngibamanzi kakhulu nxa sisiya emacansini, uthi lokhu kakuthandi kodwa mina angazi ukuthi ngenzeni. Ngicela uncedo khulu, umendo wami ungachitheka.

Impendulo
Nxa umuntu engena endlini uyaqoqoda avunyelwe phela mzukulu, isikhathi esinengi ubumanzi buyabe busitsho ukuba imithambo lemizwa yomzimba ekugogo isivumile ukuba ukhulu angene etshelele nje. Kodwa nxa kusiba yibumanzi obudluliseleyo kuyadingakala ukuba ubone izalukazi kumbe obabakazi bakufundise ukuba kuyafakwa okulilenjana kumbe loba yini engamunya bonke ubumanzi ukwenzela ukuba lithi lisiya emacansini bubebulutshwana ubumanzi. Kwesinye isikhathi kukhona lokhu abathi yintolwane, kumbe isihlahla somganu abasifaka ngaphansi. Lakho lokhu kulendlela zakhona zokwenziwa ezaziwa yizalukazi lakhona abezempilo bengakhuthazi abantu ukuthi bakusebenzise. Kungakho ke, bonana labogogo kumbe uyekondaba zempilo.

Umbuzo
Khulu abantwabami abamazi ubaba wabo. Ngathandana laye kudala njalo sekuleminyaka elitshumi lanhlanu ngingakaze ngimbone. Wabatshiya besesebancane. Okungihluphayo yikuthi khathesi omdala usefuna ukwenda kodwa angazi ukuthi ngithini ngendaba yokuvelelwa kwakhe nanko phela uyise kakho njalo kazange angitshengise abangakibo. Ngenzeni Khulu?

Impendulo
Loba kungela qhude kuyasa. Ukungabi khona kukayise akungeke kwaba ngumgoqo owenqabela umendo womntwana. Banengi ekadeni sikhula ababelotsholwa oyise singabazi njalo abanye bedliwe zindunduma zeWenela. Qhubekela phambili ulungisele ukulobolisa mzukulu kodwa ubachasisele osebele bakho ukuba wena nguwe ubaba-mama lapha ekhaya, njalo kuyadingeka ukuba ubize abafowenu babekhona ukuze bakuzimazise kulumsebenzi ongaka. Njengoba ngitshilo ngaphambilini lekadeni abantwana bentombi babelotsholwa oyise singabazi, umthimba wabo ubemuhle okwamagama.

Umbuzo
Khulu ngileminyaka yokuzalwa engu-23, udubo engilalo ngolokuthi nxa ngisiya esikhathini ngiyahlala okwamalanga alitshumi ngikhonale. Lokhu sokusenza umkami angathakazeleli ukungithinta ngoba ngihlala isikhathi eside ngisemfuleni kungakho ke ngamalanga alitshumi la asihlangani. Nceda khulu ngiyesaba ukuthi umkami angangitshiya.

Impendulo
Ekadeni bezisiba khona izihlahla ebezidliwa ngabantu asebesiyakwenda ezenza bengahambi ithuba elide emfuleni ngoba lokhu kuyalambisa ubaba emacansini. Kuyadingakala ukuba ubonane labogogo kumbe obabakazi bazakuchathekela indlela zesintu ezilakho ukuba zikukhuphe enkingeni eletha indlala yocansi endlini. Nxa ungaphumelelanga kungaba kuhle ukuba ubonane labondaba zempilo labo bazame ukukhangela ukuba ngesimanje ungasizakala njani ukuze lizikholisele ucansi lwenu bazukulu bami. Akufanelanga akuzondele ngoba lawe kawuzenzi ngitsho.

Umbuzo
Khulu ngingumama oleminyaka yokuzalwa engu-28. Kulento engikhathazayo. Ngathathwa yindoda elomntanayo ngileminyaka engu-21. Sahlala iminyaka emithathu singelamntwana. Umkami wasemithisa unkazana osebenzayo. Saxabana, sazovumelana ukuthi mhlawumbe yimi engingazithwaliyo. Abantwana sihlala labo bobabili. Okuyikho esekungikhathaza nanku. Kunyanga ezintathu ezedluleyo, ngavakatshela eSouth Africa, ngahlanga lejaha engake ngathandana lalo sisafunda. Ekuhlanganeni kwethu sacina sihamba emacansini ehoteleni. Khathesi senginanzelele ukuthi ngilomthwalo olenyanga ezinthathu. Osekungihlupha yikuthi umthwalo ngokabani. Ngenzenjani khulu? Ngiwunike umkami kumbe ngiwunike lo omunye. Nceda khulu.

Impendulo
Ngizakuxolisa mzukulu ngokungaziphathi kangaka, uze ufike ebangeni lokuya emacansini lomuntu ongamaziyo lingazivikelanga ngejazi lomkhwenyana. Kuyadingakala ukuba use umthwalo ngakibo, nxa umthwalo ungowomkakho kuhle lokhu kodwa nxa ungowaphandle lokhu sekusitsho ukutshabalala komendo. Ngamehlo enyama kunzima ukuba sitsho ukuba umthwalo ngokabani, kungaba kuhle ukuba uzame futhi ukuyabonana ledlalicatsha lakho leli lihambe liyehlola kulokhu abathi ngesilungu yi DNA ukuze uthi uthatha isinqumo ususazi ukuthi ingane ngekabani, kulokuhamba emnyameni. Kodwa lesisenzo ligejwa kuziliwe mzukulu. Zama ukwenza into ezakupha ukuthula empilweni yakho, ikhabele kude unembeza.

 

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds