uMthunywa
Sokulomnyaka umkami engincitsha ucansi
NGINGUMAMA otshadileyo, sileminyaka engu-44 lomkami njalo sibusiswe ngomntwana oyedwa.
Uhlupho yikuthi umkami usengincitsha inkonzo yasekameleni, sokuze kusiyaphela umnyaka. Nxa ngimbuza uhlala esithi ukhathele.
Konke okumele akwenze njengobaba uyakwenza kodwa yona dololo. Kulempawu ezingenza ngisole ukuthi angabe elaye omunye asethandana laye ngoba ngisanda kuthola amajazi omkhwenyana emoteni yakhe.
Kakaze alale engekho endlini okuveza ukuthi le imikhuba uyigila emini.
Ngicela ukwazi Khulu ukuthi angabe elokhu engithanda na loba cha ngingadlalisi isikhathi sami?
Impendulo:
Okubalulekileyo okufanele uzibuze khona yikuthi lifike njani kulesisimo elikuso lamhlanje.
Umnyaka yisikhathi eside sokungayi emacansini phakathi kwabathetheneyo.
Kubalulekile ukuthi nxa litshadile lizame ngakho konke okusemandleni enu ukuthi lenqabele izimo ezifana lalesi.
Akutsho Mzukulu, kayisuwe na owaqalayo ukwala ukuya emacansini wacina umkakho laye inhliziyo inyampa?
Phela kumnandi emuntwini wesifazane nxa engafuni ukuya enkonzweni kodwa kubanzima nxa owesilisa engasafuni laye.
Akukuhle ukuthi ayedinga phandle nxa engatholi lutho ngekhaya kodwa kumele sikhumbule ukuthi abantu besilisa bacina benyampa inhliziyo nxa owesifazane elokhu ethi ukhathele loba uyagula nxa kuyiwa emacansini.
Zibuze ukuthi konakala ngaphi. Nxa usuzitholile impendulo, xoxa lomkakho umbonise lapho iphutha elibe khona libe selikhumisana umlotha.
Uthanda ubunandi labangane ukwedlula mina
Ngilenkinga lomkami othanda indawo zobumnandi ukwedlula imuli yakhe.
Uhlezi elabangane bakhe isikhathi esinengi, aze abuye phakathi kobusuku.
Lokhu kuyangihlukumeza ngoba sincane isikhathi asichitha lami labantwana.
Umkami uleminyaka engu-42 yokuzalwa. Mina ngikhangelele ukuthi uyakhula kodwa yena uphenduka umntwana.
Ngicela ungisize Khulu ngenzeni, sengizamile ukukhuluma laye ngakho kodwa katshintshi. Ngenzenjani?
Impendulo
Kukhanya sengathi umkakho ungene esigabeni sempilo esibizwa ngokuthi yi-“midlife crisis”. Sivame ukufikela abantu besilisa labesifazane ezikhathini ezehlukeneyo zempilo yabo.
Abanye sifika ngokuphangisa kodwa kwabanye siphuze ukufika.
Kuncane ongakwenza ukumvimba ngoba isikhathi esinengi umuntu okulesi sigaba kakwazi ukuthi kwenzakalani empilweni yakhe.
Yisigaba lapho umuntu afisa ukwenza izinto angakaze azenze empilweni yakhe.
Ubona angathi kukhona lapho azasala khona nxa engazikhiphi labangane bakhe.
Indlela ongamsiza ngayo, okokuqala yikuthi wazi futhi ufunde nge-midlife crisis ukuze ukwazi ukumelana lendlela enza ngayo.
Yisigaba esedlulayo kodwa kuhle ukuthi lawe uzimisele ukuthi uzikhiphe ndawonye laye.
Akufunayo nje yikuphuma, atshaywe ngumoya ukuze azizwe sengathi uyakholisa impilo.
Angakujabulela ukuzwa ngelinye ilanga lawe usithi asizikhiphe litshaywe ngumoya.
Ngithole amaARVs efihliwe empahleni zomkami
Sileminyaka emihlanu sithandana lejaha lami elisanda kungilobola.
Kunyanga ezimbalwa ezedluleyo ngithole amaARV efihlwe empahleni zakhe.
Ngethuka ngaqanda ngoba kakaze atsho lutho kimi ngakho.
Ngize ngaba lesibindi sokumqonda kumaviki amabili adluleyo.
Akazange aphike ngimbuza ngawo kodwa wavele waxolisa nje, ekhihla isililo ethi wathola ukuthi uleHIV engakahlangani lami.
Uthe ubesesaba ukungitshela ngoba esesaba ukuthi ngizamtshiya nxa sengisazi iqiniso.
Manje kusobala ukuthi lami ngilegcikwane ngoba asikaze sizivikele kuyo yonke le iminyaka. Angazi ngempela ukuthi ngenzenjani.
Sengikhale ngaze ngaphelelwa zinyembezi. Ngifana lomuntu ofileyo kodwa ngiphila.
Impendulo
Indaba yegcikwane lengculazi yinto enzima ngempela ngoba kuba nzima ukwazi ukuthi omunye umuntu uzayithatha njani.
Yebo Mzukulu, yisenzo esibi esenziwe yisithandwa sakho.
Nxa yena ebesekwazi ukuthi uphila legcikwane, bekungumlandu wakhe ukuthi akuvikele njengomuntu amthandayo.
Bekungafanelanga ahlangane lawe engazivikelanga.
Utshengise ukungacabangi lokungakucabangeli.
Okubalulekileyo khathesi yikuthi uhambe uyehlolwa ukuze ube lesiqiniseko sokuthi ulalo yini igcikwane.
Thola isiqiniseko kuqala ngaphambi kokuthathela izinto phezulu. Kusukela manje, kubalulekile ukuthi uzivikele nxa usiya emacansini ngaso sonke isikhathi.
Hlala phansi lomkakho likhulume ngothando lwenu.
Liphutha elenziwe ngumkakho kodwa nxa usamthanda futhi uzimisele ukumxolela lingaqhubeka lithandana. Ukuba legcikwane leHIV akutsho ukufa.
