Inhlupho zalamuhla: Sebetshadile abangane bami, mina kangila lejaha

08 Oct, 2015 - 09:10 0 Views
Inhlupho zalamuhla: Sebetshadile abangane bami, mina kangila lejaha

uMthunywa

Kangithandi umamazala
Khulu ngicela izeluleko bakithi. Umamazala wami uyangihlupha. Ngileminyaka yokuzalwa engu-21, ngende ngomnyaka ophelileyo kodwa umamazala kafuni kungibona uthi yena kukhona intombazana ayefuna ukuthi ithathwe ngumntanakhe kungakho mina ngifana nje lesiqalekiso kuye. Uyahlupha lumama kafuni kungibona ngihlezi phansi kumele ngihlale ngisebenza ngaso sonke isikhathi njalo uhlala engitshela ukuthi ngimubi njengenunu. Ngikhathele sengize ngicabanga ukubuyela ngakithi losane lwami. Umamazala sihlala sonke.

Impendulo
Mzukulu iBhayibhili lathi ngokuthathana owesilisa noma owesintwana bazatshiya abazali babo, laba bobabili bayokwakha umuzi wabo bandise isizwe sabo. Lina-ke latshada yini? Elingakwenza lomkakho yikudinga indlu yenu. Udubo lapha yilolu, angihlambazi ngiyalibikela lomhlaba wonke, umuntu ongumama uleziko lakhe, umkulu wakhe kanye lembiza zakhe. Pho wena nxa ususebenzisa into zikanyokozala yena abe sesebenzisani? Into akubangisa yona liziko. Unyokozala watshiya ingakibo wazozala umkakho pho ke nxa ususithi angakuphekeli wena, abe esesenzani unyokozala? Zwana mzukulu, akulamuntu wesintwana okuthiwa mubi. Ububi busenhliziyweni yomuntu. Usane lolu alusilo lwakho kodwa ngolwenu lejaha lakho. Lina lobabili selilimile insimu yavuthwa, pho ukuba yinunu kungena ngaphi wena usulomntwana. Mhloniphe unyokozala ngokumtshiya lembiza zakhe ngesihle.  Zitshayeleni ihlahla lejaha lakho limenzele konke lisemzini wenu.

Ngiyesaba ukukhombisa
Khulu linjani? Ngiyajabula ukuba lethuba lokuxoxa lawe ngohlupho lwami. Khulu ngiyindoda eleminyaka yokuzalwa engu-35. Udubo yikuthi angilamfazi njalo angilamntwana. Angikaze ngithathe Khulu. Abanye bathi mhlawumbe ngalungiswa ngumama yikho nje ngisehluleka khona ukukhombisa. Kuyangehlula ukulanda owesifazane ngimtshele ukuthi ngiyamthanda. Angikaze ngibe lentombi. Kulomunye untombazana engake ngezwana laye kodwa ngathi ngibona esefuna sithandane ngahle ngaqala ukumbalekela. Ngenzeni Khulu? Abantu bathi ngiyaloya. Ngiyafisa ukuba lemuli kodwa kuyangehlula.

Impendulo
Ngiyaphila mzukulu. Indaba okhuluma ngayo ingenza ngihlobe. Ungaqali mzukulu ukuthi uthi wena unyoko nguye okwenza isihluku lesi, ngoba aluba kwakunguye ngabe wahle wakubulala ulusane. Tshiyana lakho lokhu okuzwa kukhulunywa ngodingindaba abagangileyo. Impilo yakho lapho okhona khathesi yeyeme kunyoko. Kungakho-ke mzukulu kumele ube lesibindi kumbe ulande umalumakho umtshele ngohlupho lolu obhekane lalo angakuphathisa.

Sebetshadile abangane bami, mina kangila lejaha
Khulu kwenziwa yini bonke abangane bami engakhula labo batshadile mina ke kuyala. Sengize ngicabanga ukuthi mhlawumbe ngilomnyama. Ngileminyaka engu-36 kangikaze ngikhonjiswe.

Impendulo
Akulalutho olalo, imvamo yabantu abanjengawe, umuhle kakhulu njalo uthanda ukuthi nxa uphakathi kwabantu ukhulume lembeko yokuziphatha abesilisa babe sebekwesaba. Mzukulu abadala bebesithi bona kuyabe kumele udinge uvela bahleke lomlomomnandi lomchithazulu legumalala lomphafa uhambe uye emfuleni lomunye umuntu oyisihlobo sakho. Faka lezizihlahla phakathi kwenditshi ugeze, ungaqeda gebha igodi etshebetsheni ubusuchithela umuthi lowo kulelogodi, usuqede ukugeza, umbokothe ngenditshi obugezela kiyo, uyigqibele ngetshebetshebe. Suka lapho uye ngekhaya. Ungakwenza lokhu mzukulu ngiyakutshela uzazibona izimanga bazabuya ngobunengi babo phansi kwakho. Kodwa-ke mzukulu qaphela ukuthi kumele ukhethe nje oyedwa ngoba kulezi insuku sekulemikhuhlane ethelelwana emacansini.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds