uMthunywa
Ngifuna ukuphila okufana lomkakhe
Khulu: Ngilabantwana ababili lenye indoda ethetheyo. Okungizwisa ubuhlungu yikuthi ubaba lo uthi uyangithanda kodwa akwenzela imuli yakhe kugoqela umfazi labanye abantwabakhe thina kasenzeli. Abantwabakhe lomkakhe bafunda ezikolo eziphezulu kukanti abami bafunda ekhaya kumama. Mina ngiloja i-one room emalokitshini kodwa umkakhe uhlala emasaladini. Umkakhe uhamba ngovava lwemota mina ngitshaya ngorama. Iqiniso yikuthi kakaze angithathe kodwa ngifana nje lomkakhe ngoba angivunyelwa ukubonakala lomunye umuntu wesilisa njalo angivunyelwa ukuyadinga umsebenzi. Imali uyanginika kodwa unginika i$200 qha ngenyanga. Ngenzeni Khulu lami ngifuna ukuphila impilo enjengeyomkakhe.
Impendulo
Kulusizi ngoba awusacazululanga ukuba lihlalisene nje kuphela lalindoda kumbe yakhupha inkomo zayangakwenu. Lokhu kuyabe kusenza kube lula ukuhlinza udaba lwakho. Kungasenani, kuhle ukuba ukhulumisane laye lubaba, njalo umbonise ngesifiso sakho ukuba ufisani wena.Uhlupho lungaba yikuthi kwelinye ithuba wena kawuzange umphumele egcekeni ekuqaliseni, wasuka wakhangwa luthando, laye wasebona kungani konke akwenzayo kuhle kanti isikali sakhe kasihlelekanga nje. Waphambanisa ngokumvumela ekuqaleni. Njengoba ngitshilo ngaphambilini hlala laye phansi umvulele lonke iqiniso elisenhliziyweni yakho, njalo ubeke kuhle izinto zonke. Ekukhulumeni kwenu kuyadingeka ukuba ubonise ukuzithoba njalo ubonise ukunakekela imuli yakho, kunye lekusasa yayo. Ungakhaleli ukuphila impilo enjenge yomkakhe ngoba uyabe ubonisa ukufuna ukungena emjahweni laye, kodwa fisa ukuba lawe ubelempilo engcono lemuli yakho. Ungaze wavuma izinto eziza thokozisa lubaba kodwa wena ungenelisi ukuphila lazo.
Sengifuna umfazi wesibili kodwa . . .
Khulu: Ngiyindoda eleminyaka yokuzalwa engu-36. Ngithethe njalo ngilabantwana abathathu. Ngilomsebenzi wami omuhle kakhulu kangisweli lutho Khulu. Indaba ilapha. Sengihlangane lomunye umama engifuna ukumenza umkami wesibili. Umama lo sengilesikhathi esingangeminyaka emithathu ngithandana laye. Inkinga yikuthi umkami ulobukhwele ngeke avume ukuthi ngithathe isithembu. Ngimtshele njani umkami ngendlela azayizwisisa. Ngenzeni Khulu ngoba sengifuna ukumthatha umfazi wesibili. Ngicela izeluleko Khulu.
Impendulo
Ngiyaluzwa mzukulu udaba lwakho lolu.Kuyadingakala ukuba ubikele izihlobo zakho ngaloludaba lwakho, lokufuna ukudingela umkakho esinye isandla. Ubuhle bakho yikuthi kawuthandi ukwenza izinto ufake omunye umuntu ekhwapheni abe ebizwa ngokuthi ngumakhwapheni wakho. Kuzakuthi umdeni wakwenu uhlale phansi ukhangelisise udaba lwenu, kube sekusithi labo ababonakala njengabantu abaseduze kukamkakho, bahambe bayembikela njalo bacele indlela zokuba wena ucela elinye ikhitshi phela, kodwa lokhu akuzalwa yikungasuthiseki kwakho kodwa yikufisa ukwandisa inhlanyelo yakwenu.Kuyadingakala ukuba labakibo kankosikazi wakho libabikele hatshi ukutshukana lendaba enje bengazi lutho. Lingakuhlalela phansi njengomuzi kulakho ukuba bonke abantu bakuzwisise njalo kube yinto engaba lesisindo kusasa.
Ngiya emfuleni amalanga amanengi
KHULU: Ngithemba uphilile. Ngingowesifazane oleminyaka engu-29. Udubo yikuthi nxa ngisiya emfuleni ngihamba okwamalanga ayisitshiyagalolunye Khulu. Kuyangikhathaza lokhu kakhulu ngoba abanye bami bahamba insuku ezintathu nje. Ngicela ungincede Khulu.
Impendulo
Abantu kabafanani mzukulu babunjwe ngo kwehlukeneyo phela, yikho abanye uthola benikwa inzalo kodwa abanye hatshi. Lawe ungazikhathazi ngokuhamba kwakho emfuleni. Yonke into emzimbeni womuntu ilendlela esebenza ngayo.Kodwa nxa kuyikuthi wena uyopha kakhulu ngalelithuba, kuyadingakala ukuba ubone uDokotela ozaba lakho ukuhlolisisa abone uhlupho ukuba lungaphi.
Umkami litshapha njalo kagezi
Khulu: Ngiyindoda ethetheyo. Uhlupho yikuthi umkami litshapha. Kafuni kugeza kumbe ukuhlanza indlu yethu. Ezikhathini ezinengi ngicina ngizenzela okunengi okunjengokuwatsha impahla zami zemsebenzini. Yena uvuka adle abesewothamela ilanga phandle exoxa labangane bakhe. Sengazama ukukhuluma laye Khulu kwehlula. Mina angiyithandi ingcekeza. Ngabe ngangisazi ngabe angimthathanga. Okukhulu okungicasulayo yikuthi engutsheni angisembathi laye ngoba ulephunga elibi. Ngithemba uyazi lokhu engikhuluma ngakho. Ngeke ngigubuzele nxa ngembethe ngubo yinye laye. Ngenzeni ngalokhu Khulu. Bengingafuni ukumyangisa ngokutshela abadala kodwa sengidubekile.
Impendulo
Kubonisa ukuba lina lobabili selehlulene ukudinga indlela zokulungisa uhlupho lolu, kungakho-ke sekudingakala ukuba ubikele abadala ngalokhu. Okungaba kuhle yikuba ukhethe nje omunye phakathi kwezihlobo zakhe obona ukuba ulesifuba njalo bayazwisisana lomkakho. Umtshele konke okufisayo njalo longakuthandiyo ukwenzela ukuba athole indlela zokukubangula ameva akho, angaka. Wenze kuhle sibili ngokunga hambi utshaya impembe ngohlupho lwakho kodwa waba lesifuba njenge ndoda. Ungakwenzi konke lokhu ngendlela ezayangisa umuzi wakho kodwa kakube yindlela ezawutshiya ulesithunzi njalo ungumuzi owakhekileyo.Laye lowo muntu ozamdinga umtshele ukuba engahambi ekwembula amakhwapha kodwa atshiye elakhele umuzi wenu. Ngilethemba laye engakuzwa sekuvela ebadaleni uzathatha inyathelo, azwanane lamanzi.
