Inhlupho zalamuhla: Kasazithandi unkosikazi wami

28 Dec, 2017 - 01:12 0 Views
Inhlupho zalamuhla: Kasazithandi unkosikazi wami

uMthunywa

Kasazithandi unkosikazi wami
Unkosikazi wami usengitshitshele nje. Akasazithandi ngendlela ayezithanda ngayo ngaphambi kokumthatha. Uselala engagezanga njalo lendlini sekuhlala kumahlikilili ngengcekeza. Nxa evela emsebenzini uvele nje aziphosele esofeni abukele umabonakude. Kwezinye izikhathi ngimthola embhedeni ezihlalele etobeza ifoni yakhe. Lami ngiyazama ukumncedisa. Ngiyesaba ukuthi mhla sisiba labantwana kuzakuba njani nxa kunje khathesi.

Impendulo:
Mzukulu, abantu abakhuthalanga  ngendlela efanayo. Kuyinto enhle lencomekayo ukuthi uyamsiza kumisebenzi yendlini. Kungathini mzukulu uke uzame ukukhuluma laye unkosikazi wakho mhlawumbe yena kaboni ukuthi lokhu akukuphathi kuhle. Kungenzakala ukuthi yena kakuboni ukuthi ukuthanda kwakhe ifoni kuyona izinto emzini wenu. Lendaba yokungaziphathi yikhulume futhi laye.

Kaselandaba lami, uselomakhwapheni
Ngingumama oleminyaka engu-31 njalo sengileminyaka emithathu ngitshadile. Ngisanda kuthola ukuthi umkami ulentombi emhlanyisayo. Akaselandaba lami ngitsho. Ngadinga inombolo yocingo kamakhwapheni wakhe athandana laye kodwa wangitshela ukuthi ngeke ehlukane laye ngoba uyamncedisa ukondla abantwabakhe. Okungizwisa ubuhlungu yikuthi umkami usehamba ekhuluma ngami. Kukanti nxa engekhaya ulolaka. Sengilula lasebantwini. Ngicela ungincede ungibonise khulu, umtshado wami ungakachitheki.

Impendulo:
Umtshado udinga abantu ababili asebekhulile engqondweni. Kusegcekeni ukuthi umkakho kakakhuli. Yindoda enjani ekhuluma ngonkosikazi wayo? Kubuhlungu ukwazi ukuthi umkakho uthandana lomunye umuntu kodwa kwakungaqondanga ukuthi wena ufonele umakhwapheni lowo umtshele lokho owamtshela khona ngoba kwehlisa isithunzi sakho njengonkosikazi wendlini. Wena qondana lomkakho. Nguye owathi uyakuthanda waze wayabona abakini. Umuntu omthandayo uyamhlonipha futhi uyamvikela. Kukhanya umkakho kakwenzi konke lokhu.

Umamazala kafuni siyehlala sodwa
Ngithemba uphilile Khulu, lami ngiqine saka. Ngicela usibonise sixakekile. Sesileminyaka emithathu engithethe njalo sihlala ngakibo. Sesifuna ukuyahlala sodwa ngenxa yendlela esihlezi ngayo. Sibaliselwa njalonje. Inkinga yethu yikuthi umamazala wami akafuni sihambe. Uyasifungela uthi singavele siphume singaphenduki futhi emzini wakhe. Uze athi loba angafa singabuyi emngcwabeni wakhe. Lokhu kusiphatha kubi ngoba siyabathanda kodwa ngeke sihlale labo impilo yethu yonke.

Impendulo:
Kubukeka sengathi umamazala uyakuthanda kakhulu ukuhlala lani. Mhlawumbe yini elenza konke ngekhaya. Mhlawumbe njalo wesaba ukuthi lingasuka kuzatshintsha izinto ekhaya. Nxa kuliqiniso ukuthi yini elenza konke ngekhaya kubalulekile ukuthi libaphe isiqiniseko sokuthi akukho okuzatshintsha ngokuphuma kwenu ekhaya. Kubalulekile ukuphuma liyokwakha umuzi wenu ukuze likhule. Kodwa kubalulekile njalo ukuthi abazali benu libatshiye bejabula. Bapheni isiqiniseko sokuthi ukuphuma kwenu akusoze kutshintshe lutho ebudlelwaneni benu njengemuli.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds