uMthunywa
Ngenzeni ukuze angithathe
SILEMINYAKA engu-10 sithandana lesoka lami kodwa besike sithathe ikhefu phakathi lendawo siphinde sibuyelelane.
Inkinga yami yikuthi minengi iminyaka sithandana. Kungani engakangithathi lakhathesi? Uke akhulume ngokutshada aphinde azithulele. Angisakwazi ukuthi ngizathini ukuze angithathe.
Impendulo:
Ngeshwa ngeke wenze umuntu ukuthi akutshade engathandi, lokho kumele kuphume kuye ngaphakathi.
Ngabe uke wambuza ukuze uthole izimpendulo zakhe? Kungenzeka ukuthi akalawo amandla okutshada.
Utshilo lawe ukuthi uthando lwenu luleminyaka engu-10 beluke luwe okuchaza ukuthi bekulezimo ebelidlula kuzo. Zikhangele lezo zimo ukuthi ayisizo yini ezenza abe lovalo umuntu wakho nxa ecabanga ngokutshada. Zinuke amakhwapha lawe ukhangele ukuthi ngabe uyinhlobo yokutshadwa yini. Ulalo lelungelo lokuqhubeka ngempilo yakho nxa ubona ukuthi ubambezelekile. Impilo yomuntu imfitshane kakhulu.
Umkami uyahlala inyanga yonke engangikhulumisi
Ngicela ukubuza, kwenziwa njani nxa ulonkosikazi owenelisa ukuhlala phose inyanga yonke engakukhulumisi nxa lixabene. Lokhu ukwenza loba kunguye osephutheni. Isimo siba sibi kuze kubone ngitsho abantwana bethu ukuthi akukuhle phakathi kwethu. Ingu-10 iminyaka sitshadile kodwa siselenkinga efanayo. Angisakwazi ukuthi ngenzenjani.
Impendulo:
Kujwayelekile ukungaboni ngaso linye emtshadweni kodwa kuhlalwa phansi zikhulunywe izinto. Alisoze lihlale livumelana ngaso sonke isikhathi kodwa okuqakathekileyo yindlela elikhuluma ngayo nxa lingaboni ngaso linye. Sidinga ukukhula emtshadweni ngoba izinto kaziyikuhlala zihamba ngendlela esiyifunayo ngaso sonke isikhathi. Siyazi ukuthi usukwenze konke okusemandleni akho kodwa sikholelwa ekuthini umtshado awulula futhi udinga ukuthi siwulwele nsuku zonke.
Zama ukuthola umeluleki wezomtshado loba umuntu elimthembayo elizenelisa ukuhlala laye phansi ukuze lenelise ukubeka izinhlangothi zenu lobabili. Kusobala ukuthi unkosikazi wakho ulezizatho ezenza aziphathe ngale indlela okungenzeka aphumele obala ngazo nxa kukhona umuntu wesithathu ozakuzwa udaba lwenu.
Akukho elingeke likwenelise ukukulungisa nxa lobabili lifuna ukulungisa lokwakha ikhaya lenu.
Ngilesiqiniseko sokuthi unkosikazi wakho uyawuthanda umtshado wenu futhi akazimiselanga ukuthi upheliswe yinto encane njengokuzehlisa.
Kafuni kutshiya umkakhe
Ngileminyaka engu-27, silezinyanga eziyisitshiyagalombili sithandana lesoka lami. Ngihlangana lalo lathi lizehlukana lonkosikazi walo. Njengamanje ngikhulelwe ingane yalo kodwa lilokhu lingibelesela ngokuthi licabanga ukubuyela kunkosikazi walo futhi labangakibo bathi kalibuyele kunkosikazi walo.
Aliyamukeli eyokukhulelwa kwami futhi lithi ngenze ngamabomu. Manje selisithi kangikhiphe isisu.
Ngiyabazi ubunzima bokukhuliswa ngumzali oyedwa ngakho ngilovalo lokukhulisa ingane ngingedwa kodwa futhi ngiyazi ukuthi unembeza wami uzangilahla nxa ngiqhubeka ngikhipha isisu. Ngenzenjani?
Impendulo:
Siyazwelana lawe ngalesi simo ozithola usukuo. Kusobala ukuthi ubengazange ahlukane lonkosikazi lumuntu othandana laye. Kuyenzeka ukuthi ngokuxabana okuncane omunye abone kungcono ukuhangela engxenye bese kuthi nxa sekulunga obekubaxabanisile atshiye la ebesezinze khona.
Lawe bekumele ube lesiqiniseko sokuthi uhlukene lonkosikazi wakhe njengokutsho kwakhe. Ukwenzele okukhulu ukungathembeki ngokuthi aye lawe emacansini esazi kuhle ukuthi kaqedanga emuva. Ziyenzeka-ke izinto ezinjalo empilweni.
Okubalulekileyo khathesi yilo muntu osumthwele. Umntwana ngitsho loba efike njani uyisibusiso esikhulu ngakho ungavumeli ukuthi akwenzise intando yakhe loba wazi wena ukuthi ukukhipha isisu akuhambisani lawe.
Yisikhathi sokuthi umele iqiniso. Yebo lenzekile iphutha wathandana lomuntu ongelaqiniso kodwa kulomphefumulo okumele uwucabangele.
Lawe ukhuliswe ngumama yedwa kodwa nanku uyaphila. Ngabe kwenzekalani ukuba umama wakho wakukhipha ngoba esesaba ukukukhulisa?
