Inhlupho zalamuhla

04 Jan, 2018 - 01:01 0 Views
Inhlupho zalamuhla

uMthunywa

Bayangithethisa ngoba kangilamntwana
Ngingumakoti osemncane oleminyaka engu-26 yokuzalwa. Asiselabazali lomkami. Uhlupho ngikhathazwa ngubabakazi womkami. Ungibiza ngazo zonke inhlamba ezikhona emhlabeni ngoba kangilabantwana. Sebeke bangibiza labantwabakhe bathi ngalanda ukuzokudla imali kwabo. Nxa umkami engisekela bathi ngamdlisa. Lokhu sokuze kwabangela ukuthi singakhulumisani. Ngenzeni Khulu nxa kunje, ngicebisa.

Impendulo:
Mzukulu uphakathi kobunzima ngoba vele kulabantu ezimulini abakholwa ukuthi ukutshada kuchaza ukwanda kwemuli. Kuyacaca ukuthi ubabakazi wakho ubezitshela ukuthi ukufika kwakho kuzakwandisa imuli. Uhlupho nje mzukulu kawusachazanga ukuthi kuyini okulenza lingabi labantwana. Zamanini ukuhlala phansi njengemuli likhulume ngaloludaba. Ukungakhulumisani liyimuli yinye akusizi ngalutho futhi lani lizayidinga imuli ekucineni. Hlalani labo phansi libazise izizatho ezenza ungabi labantwana lokhu kungabe kuyikuthi liyazama kodwa kuyala kumbe mhlawumbe kalikalungeli ukuba labantwana.

Umkami uthanda isonto ukwedlula umdeni
Unkosikazi wami uyasonta, mina angisonti. Angikaze ngibe lohlupho ngokusonta lanxa kukhona engingasakuboni kuhle. Uphatheke kakhulu ngemisebenzi yebandla lakumfundisi wakhe. Akaselaso ngitsho isikhathi sethu njengemuli. Lomntanethu usenakekelwa yimi isikhathi esinengi ngoba kuhlala kulento ekhona esontweni. Umkami uxoxa kakhulu lomfundisi wakhe efonini kanye lakuWhatsApp. Angifuni abone angathi kangimthandi uNkulunkulu kodwa ubudlelwano babo buyangisolisa. Angisamthembi loba esithi kulemvuselelo zobusuku bonke ngoba angisakwazi loba liqiniso yini loba cha. Nxa engekho esontweni ukhuluma ngomfundisi. Angazi Khulu ukuthi kumele ngenzenjani, ngicela ungiphathise.

Impendulo:
Ukuzinikela eNkosini kuyinto enhle lencomekayo futhi ulenhlanhla unkosikazi wakho ngokuba lomyeni omsekelayo njengawe nxa kukhulunywa indaba zesonto. Kodwa akukuhle nxa isonto isihamba phambili ize idlule imuli, ikakhulukazi wena njengomkakhe. Zama ukuhlala phansi lomkakho kungakonakali kakhulu emzini wenu. Mtshele ukuthi ubudlelwano bakhe lomfundisi kabukuphathi kuhle, mtshele futhi ukuthi awukujabuleli ukuxoxa kakhulu kwakhe lomfundisi ecingweni. Nxa esakuthanda uzazama ukukuqondisa lokhu.

Kasafuni ngibambe ifoni yakhe
Umkami ngimazi njengendoda ethembekileyo lokhu wangithathayo kodwa kulezi insuku akasafuni ngibambe ucingo lwakhe loba egeza. Lokhu kutsha, angikwazi nje kusukela engithatha. Nxa ngimbuza uvele alwe abuze ukuthi kungani ngingasamthembi. Ngibonisa Khulu, kangifuni kuchitha umuzi wami.

Impendulo:
Siyasolisa isenzo somkakho. Kuyacaca ukuthi kukhona angakuthandiyo ngokuthintwa kwefoni yakhe loba kukhona akufihlayo. Ayikho enye indlela yokulungisa lesi simo ngaphandle kokumqonda uthole ukuthi zitshintshe ngaphi izinto ngoba uyaqala ukwenza ngale ndlela. Ngilesiqiniseko mzukulu sokuthi uzaphumela egcekeni atsho nxa ebona ukuthi lokhu kakukuphathi kuhle.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds