uMthunywa
YiNtatheli kaMthunywa
NGENXA yokutshabalala kwezamasiko inhlanganiso yeLupane Women’s Centre sisungule uhlelo olutsha lokuthuthukisa amasiko kanye lokuwafundisa abatsha ikakhulu endaweni yeLupane.
Inhlanganiso le kubikwa iyafundisa njalo lokwenza imisebenzi yezandla eyayisenziwa endulo ngakho ifundisa abantwana besikolo ibisisipha isipho kulabo abenze kuhle ngemva kwemincintiswano ethile. Lonyaka inhlanganiso le yenze umncintiswano lo kusukela ngoLwesine kusiya kuma ngoLwesihlanu kuyonale iviki ephelileyo njalo kukhanya umncintiswano lo utshengise intuthuko edlula eyeminyakeni edluleyo.
Ekhuluma lentatheli umqondisi wale inhlanganiso uNkosikazi Hildegard Mufukare uchaze ukuthi bananzelele ukuba amasiko aya etshabalala yikho bebone kungcono ukuba bawavuselele.
“Thina njengeLupane Women’s Centre sinanzelele ukuba kuqakathekile ukuvuselela amasiko ngendlela zonke yikho nje sikhethe ukuqala ngabantwana besikolo ngoba yibo insika yesizwe. Ngakho abantwana laba bancintisana ukugida ezesintu ezigoqela amajukwa, izangoma, iwosana, amantshomani, kanye lamanye imihlobo yemigido.
“Okunye njalo sinanzelele ukuthi abantwana noma benze kahle ezifundweni kwesinye isikhathi bayaswela umsebenzi ngakho sifundisa abantwana besikolo ukuba bafunde ukweluka izitsha kanye lokuthunga ukuze benelise ukuziphilisa noma bengasebenzi.
“Into esuka ingijabulise yikuthi khathesi kukhona omunye umntwana osezibhadalela indleko zesikolo ngemali yokuthengisa izitsha azithungayo. Ngakho khathesi sikhangelele ukuthi ngelanga lomncintiswano lo sigoqele lama-Secondary Schools ukuze imfundiso le imemetheke kusasemasinya,” kutsho uNkkz Mufukare.
Induna yakule indawo uMnumzana Vusumuzi Khumalo ichaze ukuthi iyajabula kakhulu ngokuvuselela amasiko okwenziwa yile inhlanganiso.
“Ngizwa ngijabula kakhulu ngokwenziwa yiLupane Women’s Centre ngoba uMthwakazi sesifa ngokuphelelwa ngamasiko. Isizwe lesizwe saziwa ngamasiko aso ngakho khathesi isizwe sethu sesilengela emaweni.
“Ngalokhu ngibonga inhlanganiso le ngokuvuselela amasiko okutshengisa ukuthi isizwe sesivukile njengoba insika yaso sivukile,” kuphetha uMnu Khumalo.
