uMthunywa
Charity Moyo
BEKUNGABIZWA ozwayo ngoLwesibili ngeviki ephelileyo eNational Art Gallery koBulawayo lapho abasakhulayo abakade befundiswa ngokuqakatheka kwensimu emasikweni abaNsundu.
Abantwana bezikolo ezithi Regina Mundi, Mganwini Primary, Mbembesi Primary kanye leMhali Primary School bathole imfundiso ngenganekwane emkhosini lo.
Ekhuluma lentatheli zindaba onguye umqondisi walumkhosi uNkosikazi Thembelihle Moyo uveze ukuthi basungule uhlelo lolu ngenhloso yokuvuselela amasiko esiNtu kulabo abasakhulayo. Uqhubekele phambili esithi abantwana bakulezi insuku kabasakwazi ukuqakatheka kwamasiko ngoba beqakathekisa izinto ezabuya labelungu.
“Sibone kuyinto enhle ukuthi silandele isiko lakudala ukuze amasiko engabhidliki kwabasakhulayo.
“Abasakhulayo yibo ikusasa lethu ngakho kumele bafundiswe amasiko ukuze bafundise izizukulwane ezilandelayo,” kutsho uNksz Moyo.
Ugogo obesethela abantwana inganekwane nguNkosazana Isabel Ellen Mlangeni.
Ugogo uMlangeni uveze ukuqakatheka kwenganekwane kwabasakhulayo ethi insimu ziqukethe amasiko onke abantu abansundu.
Ekhuluma loMthunywa ugogo uMaMlangeni uveze ukuthi inganekwane ziyindlela yokufundisa izinto ezinjengamasiko, amazilo, njalo zithwele umlayezo oqakathekileyo ebantwaneni.
Uqhubekele phambili esithi inganekwane zisebenza njengendlela yokuqondisa ulimi ukuze lungabhidliki.
“Inganekwane ziqakathekile kwabasakhulayo ngoba ziyindlela yokufundisa kanye lokulondoloza ulimi lamasiko.
“Kubalulekile ukuthi abazali lababalisi ezikolo baziphe isikhathi sokwethela abantwana inganekwane ngoba zilemfundiso elusizo kakhulu,” kutsho ugogo uMaMlangeni.
Ubuye waphatha njalo udaba lokuthi inganekwane zifundisa abantwana ukuthembeka kanye lenhlonipho. Uveze ukuthi kudala ogogo babelomlandu omkhulu emulini ngoba beyibo ababesetha inganekwane.
Uthe intanga yakhathesi isiqakathekisa ama-movies kakhulu okucina kubangela ukungalandelwa kwamasiko.
“Abantwana abanengi sebeqeda isikhathi sabo esinengi bebukele opopayi kodwa engikukhuthazayo lamhla yikuthi abazali lababalisi kababambane bafundise amasiko ethu ngenganekwane.
“Kayisekho inhlonipho kwabakhulayo ngoba kabasatholi imfundiso eyeneleyo. Asekeleni ukubhidliza ubuntu bethu kodwa kasiphathisaneni ekufundiseni ukuze izizukulwane ezilandelayo zithole amasiko eqakathekiswa,” kuphetha ugogo uMaMlangeni.
