uMthunywa
YiNtatheli kaMthunywa
KULENDODA ebihlala ngaphansi kwenduna uMangwende eMurehwa etholakale ilamathambo esidumbu endlini yayo andubana ibikele amapholisa ukuthi ngawesidumbu somzukulu wayo asithengisela induna uChinhamora weDomboshava eGoromonzi owayefuna umuthi wokukhulisa ibhizimusi yakhe.
Imbedumehlwana le iphumele egcekeni ngesikhathi uHappisson Chirimudondo (54) ohlala ngaphansi kukasobhuku uMutandagayi, esiqintini seMukarakate ebotshwa ngamapholisa ngemva kokutholakala elamathambo omuntu abehlala lawo endlini okwesikhathi eside.
Imihlola le yavela ngesikhathi amalunga emuli yakoChirimudondo edingisisa ngokwakubakhathaza komunye umphurofethi okukhanya kwakulesandla sabathakathi .
Omele isikhulumi samapholisa esabelweni seMashonaland East, uAssistant Inspector Tendai Mwanza ufakaze indaba le, esithi uHappisson uthe isidumbu wasithengisela owayeyinduna uChinhamora, uSimon Chidziva, owabhubha ngomnyaka ka2015.
“Imuli yakoChirimudondo yabiza umphurofethi uTaurai Nyamanjerere ukuze azolungisa okwakuhlupha emulini. Umphurofethi lo, waqala ukudingisisa ngomntwana okwakuthiwa nguRashid Gamuchirai, owayengumzukulu kaHappisson.
“Kubikwa umntwana lo waloywa nguHappisson, kuthe ngemva kokubekwa kwakhe wayaphanda isidumbu waya laso enduneni uChinhamora yena owasithatha waya laso enyangeni sayalungiswa ngemithi ukuze ibhizimusi yakhe ikhule, njalo abe lemali enengi,” kuchaza uAsst Insp Mwanza.
Kubikwa uHappisson kuviki ephelileyo eqanjwa ngumphurofethi lo ukuthi wabulala umntwana kazange alandule kodwa wahle wachaza ukuthi wambulala njani, wayaphanda lesidumbu andubana ayesithengisela induna uChinhamora.
Kuvele njalo ukuthi uHappisson wacatshelwa ubuthakathi nguyise owabhubha ngomnyaka ka2009.
“UHappisson waphinda waveza ukuthi uyise wamnika izikhali zobuthakathi ezigoqela umtshoko, isibuko sokubona okuzayo, insimbi zemibhobho yakudala ezisebenzayo.
“Izikhali zonke lezi laye uHappisson wayemele aziphe umntanakhe, uElijah,” kulandisa uAsst Insp Mwanza.
Kuzwakale ukuthi phakathi kwezikhali lezi, umtshoko watshontshwa ngabanye abathakathi ngenyanga kaNcwabakazi nyakenye.
Ngenxa yokuba ngumthakathi omkhulu, uHappisson waveza ukuthi induna uChinhamora eyayilamabhizimusi eChabwino emgwaqweni osuka eHarare usiya eShamva yambikela ukuthi ifuna isidumbu somntwana ukuze ikhulise ibhizimusi yayo.
Kubikwa uHappisson wahamba yedwa ebusuku wayaphanda isidumbu somntwana lo, wayasigebhela esivandeni sakhe andubana induna ithi isibuyile basiphanda njalo basisa emzini wenduna le.
“Indoda le kanye lenduna bathatha isidumbu lesi baya laso enyangeni eyafika yathi kayisifuni isidumbu esigogekileyo,” kutsho Asst Insp Mwanza.
Kubikwa ababili laba sebeswele ukuthi basise ngaphi isidumbu bayasiphosa emfuleni uMunhenga eShamva.
Isikhulumi samapholisa siveze ukuthi uHappisson ngesikhathi ethwala isidumbu wakhohlwa amathambo amabili (imbambo lelinye elingakaziwa ukuthi ngelangaphi) acina esehlala lawo endlini kwaze kwavela indaba le.
Indaba le isivezwe ngumphurofethi bayabikela amapholisa ahle abopha uHappisson.
UHappison wetheswa icala lokuyaphanda isidumbu.
Inyanga eyiyo eyenza induna uChinhamora enze lokhu kayikabanjwa.
Amathambo asiwa esibhedlela kukhangelelwe ukuthi ahlolwe ngodokotela.
UAsst Insp Mwanza uphethe ngokucebisa inyanga ukuthi zekele ukutshela abantu amanga baze badale amacala ngenjongo yokufuna inotho.
Uthe kulicala elikhulu ukuphanda ingcwaba kanye lokuthatha isidumbu.
“Amacala amanengi okubulawa kwabantu abangelwa zinyanga kungakho sithanda ukucebisa uzulu ukuthi inotho kayiveli ekubulaleni abantu kanye lekuchithekeni kwegazi kanye lekudlwenguleni abantwana kanye lezihlobo. Inotho ibakhona ungasebenza gadalala,” kutsho uAsst Insp Mwanza.
