uMthunywa
Ethel Ncube
LIBONISWE into yamehlo inina leZezani eBeitbridge khepha umkalo uthe ehlubula impahla lamangala libona egqoke iphenti lowesifazana.
Lumtshaye lwameqa uvalo uMnumzana Jacob Ndlovu ngeviki ephelileyo nanko phela kananzelelanga ukuthi ngesikhathi ebaleka emzini wedlalicatsha lakhe lapho abesekhandwe khona ucine egqoka iphenti likamakhwapheni wakhe.
UNkosazana Sizile Ndou lanxa ebekhakhamele ngesenzo somkakhe sokuthutsha endlini egqoke iphenti lowesifazana ubonge amadlozi akwabo ngokumambulela ngokungathembeki komkakhe emtshadweni.
Ekhuluma loMthunywa uNkosazana Merylin Dube oyisakhamuzi kule indawo, uchaze ukuba uNdlovu ubesehlanyisana lomakhwapheni wakhe okwesikhathi eside.
“Amadoda ayizithutha kwesinye isikhathi uNdlovu wayethi umkakhe kasoze abekwazi ngitsho ukuthi kulomama aphila laye khonapha eduze.
“Kukhanya kulesihlobo sikamakhwapheni esafikayo ngesikhathi bebonke bezincindela uluju lwemvelo yena wasedobha iphenti likamakhwapheni wagqoka weqa ngefasiteli waya emzini wakhe.
“Wathi efika emzini wakhe umkakhe wayengani uzwe ngokunye wambiza wathi kakhulule ibhulugwe agqoke elinye ngokuzitshela ukuthi uhlakaniphile kuthiwa wakhupha konke uthe uthi mehlo suka wabona egqoke iphenti lowesifazana umkakhe kanti laye wayesembonile kwahle kwaqala umsindo,” kuchaza uNkszn Dube.
“Wathi ebuza umkakhe ukuthi iphenti ngelikabani waswela impendulo,” kubika uNkszn Dube.
Uqhubekele phambili echaza ukuba indaba le itshisa ngoba umnikazi wendoda uyala lephenti likamakhwapheni.
“Osokuhlupha yikuthi umakhwapheni athole isikhindi sakhe ngoba kafuni kuyaxolisa kukanti wesaba lokuthi lingasentshenziswa. Asazi ukuthi kuyozala nkomoni abaseduze lomakhwapheni bathi ubuthongo kasabuquthi enakana ngesigqoko sakhe sangasese,” kubika uNkszn Dube.
Ekhuluma lentatheli uNkosazana Nonzima Banda onguye umakhwapheni ofuna iphenti lakhe kuMnu Ndlovu uchaze ukuba yena kaboni cala ngalokho.
“Mina angiboni ukuthi uhlupho lwami lungaphi. Ubaba lo iphenti lami wasuka lalo engaboni ukuthi umfazi athi uyaligcina uzichithela isikhathi sakhe elami uzazibonela yedwa.
“Indoda yakhe angizange ngiyilande mina. Ngimelele ukuthi azongiqala uzangibona ukuthi nginjani ngimlindile ngilunyolovu mina angithintwa nxa efuna ingaphumi indoda yakhe katshone eyibophele emzini wakhe,” kubika uNkszn Banda.
Intatheli ibuye yaxhumana loMnu Ndlovu owafika emzini wakhe egqoke iphenti likamakhwapheni uveze ukuba kutsha ukuzwa indaba le.
“Mina ngizwa ngawe ntatheli indaba yephenti angiyazi wena ungangilandisela wawukhona ngiligqoka,” kubika uMnu Ndlovu.
Iphephandaba likazulu likhulumisane loNkosazana Sizile Ndou ochaze ukuba angeke aveze impilo yakhe emaphepheni.
“Zwana lokhu akuqali ngami angingeke ngizinqunule kumaphephandaba,” kuphetha uNkszn Ndou
