Uncategorized

Indoda ilunywa ngubabhemi, afe

05 Dec, 2018 - 23:12 0 Views

uMthunywa

YiNtatheli kaMthunywa
ZISELE zibambe owangaphansi izakhamizi zakoSikhuni duze le-Isabella Mine ngemva kokuba enye indoda idlithizwe isandla ngubabhemi izama ukumbopha qede afe.

UMnumzana Lovemore Ndlovu ulunywe ngubabhemi lo ngenyanga ephelileyo.

Ekhuluma lentatheli uMnumzana Ndodana Siziba oyisakhamuzi uveze ukuba lokhu wathwetshulwa yingwe kakaze akubone lokhu.

“UNdlovu wathi elunywa ngubabhemi lo wayeyedwa thina sambona eselenkalakatha yenxeba.

Okusimangalisayo yikuthi lakhathesi inxeba lakhona lokhu lingakavaleki.

“Wagijimela esibhedlela walaliswa isikhathi eside bezama ukuthi amathe asalele esilondeni aphume kwehlula bacina bemkhupha esibhedlela segulela ngekhaya,” kubika uMnu Siziba.

UMthunywa ubuye waxhumana lesinye isakhamuzi uMnumzana Thethani Moyo oveze ukuba abalankani ngodaba lolu.

“Lalamuhla lokhe singakuzwisisi ukuthi ubabhemi uyaluma, sakubonela kuNdlovu okuyinto eyasimangalisayo kakhulu. Efika esithi ubabhemi umthe nka ngamazinyo sasisithi uyasoma kanti uyaqeda sathi simkhangela samthola elenkalakatha yenxeba.

“Asazi ukuthi kwenzakalani kumbe wathunyelwa ukuthi amenze isihluku. Ubabhemi lo ngemva kokumluma wafa, abezifuyo bathatha ubuchopho bayabuhlola bathi ubelobhova,” kubika uMnu Moyo.

Intatheli ixhumane lalowo owalunywa ngubabhemi uMnu Ndlovu ovumileyo ukuba walunywa ngubabhemi olobhova.

“Kuliqiniso ukuthi ngalunywa ngubabhemi njalo isilonda sakhona besilokhu siphuma amathe kababhemi kodwa khathesi sesisiba ngcono. Abezifuyo bathi ubabhemi lo ubelomkhuhlane wobhova njalo wahle wafa,” kuphetha uMnu Ndlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds