uMthunywa
Nkosilathi Sibanda
UKENNETH Mhlophe uveza isikhewu esazi ukuthi usengumgcinisihlalo omutsha weqembu leHighlanders.
NgeSonto uzangena esihlalweni ngokusemthethweni lapho amalunga eBosso azavotela khona inkokheli ezintsha. UMhlophe uthole isikhundla lula kulandela ukuvalelwa phandle kukaErnest Sibanda ukuthi akhankasele ukuba ngumgcinisihlalo.
Loba engena kanje esihlalweni, uMhlophe ubeyisithandwa kumalunga eqembu amanengi, obekusitsho ukuba ubengathola amavoti wonke.
Umkhankaso wakhe wawuqalisa ngoLwezi womnyaka odluleyo ngesikhathi inengi lisalibele. Nguye yedwa osetshengisele ukuthi ulomqondo wokuvuselela inhlelo zeBosso ibeyithimu yakulezi insuku.
Kuliviki iphephandaba likazulu lixoxisane loMhlophe obike ngokujabula okukhulu “ngokuphiwa” isikhundla.
“Ngeke ngibike ukuthi sengingenile kodwa ngithi mhla amalunga engibiza phezulu ngeSonto, ngizasabela. Kuyathabisa ukuthi umkhankaso wami uqhube kuhle njalo labantu beqembu bayangemukela,” kutsho uMhlophe.
Uthe uzavuselela leliqembu libe yiBosso entsha.
“Ibhola lakulezinsuku seliguqukile njalo lendlela amathimu akhokhelwa ngayo yahlukile kuleyakudala. IHighlanders layo kumele ilandele okufanayo. Isikhathi sokuxegisa sesadlula.”
Ebuzwa ngenqwaba zenkinga ezibhekane leHighlanders, uMhlophe uthe usehlele amacebo okuphungula isikwelede seqembu lokuvuselela ikolitshi labadlali.
IHighlanders ilesikwelede semali esifika isigidi zamadola.
Kumnyaka odluleyo, uMhlophe wazisa iphephandaba likazulu ukuba uhlose ukwenza iBosso ibeliqembu lebhola elikhokhelwa njengebhizimusi.
“Phezulu kwakho konke okwangifuqa ukuthi ngikhankasele ukuba ngumgcinisihlalo yisikwelede semali esiganxele ithimu. Sekuyiminyaka sisehluleka ukuqeda isikwelede lesi. Ngizazama ukuthi nxa sengisesihlalweni ngiguqule udaba lokuphathwa kwemali.
“Kufuneka iqhinga lebhizimusi ukuze siphungule isikwelede lesi. Ngilalo iqhinga. Amahofisi enkokheli zeBosso afuna abantu abacabanga ngokukhalipha. Inkokheli ezikhaliphileyo zingaqeda zonke indubo zeqembu.”
UMhlophe uthe uzakhulumisana labo bonke abakweledwa yiBosso.
Ngokungena kukaMhlophe, iBosso ikhangelelwe ukuthi yenze kuhle lasenkundleni. IHighlanders yacina ukuthwala inkezo yeligi ngo2006.
Utshintsho oselukhona kuleliqembu lungakhuthaza umqeqetshi omutsha uMadinda Ndlovu labadlali abatsha asebedlalela iqembu.
