uMthunywa
Mthokozisi Dube
INKAMPANI ebona ngokulungiswa kwempahla yokufuyela inkukhu iHigrow isibike ukuba abalimi beMatabeleland North leSouth balomlandu omkhulu wokuvala isikhexe sabafuya inkukhu kulo umhlubulo kulandela ukuthi abalimi basuka kwezinye izabelo bezothengisa inkukhu lamaqanda lapha.
Ekhuluma lentatheli embukisweni weTrade Fair kuviki ephelileyo, uMnumzana Sona Mpofu ongumaqhuzu kule inkampani ubike ukuba inkukhu lamaqanda athengiswa kulo umhlubulo avelela endaweni ezibalisa iChegutu kanye leSouth Africa.
Njenge-Higrow silokudana ngesenzo sabalimi bakulo umhlubulo bona abavumela ukuthi abanye abalimi bazethengisa inkukhu zabo lamaqanda kule indawo ngenxa yokungafuni ukungena kubhizimusi lokufuya inkukhu,” kuveza uMnu Mpofu.
UMnu Mpofu uqhubekele phambili ebika ukuba ilizwe lifuna amaqanda ayisigidi ngelanga kukanti thina njengabalimi asilifikisi lelo nani kungakho amankampani aphandle abona kulamathuba amahle okwenza ibhizimusi kuleli.
“Abalimi bangathi isizatho yikuthi abalandawo zokufuyela kungakho iHigrow lonyaka ibenzele i-Battery Cage okuyindlela entsha yokufuya njalo ejonge ukuphathisa abalimi abangela ndawo ezinkulu zokufuyela,” kubika uMnu Mpofu.
UMnu Mpofu wengezelele ngokuthi i-Battery Cage le ilakho ukufuyelwa inkukhu zohlobo lwama-layers ezingu-96 njalo ilula ukuyihlanza ukuze kwenqatshelwe imikhuhlane efana labo-coccidiosis yona evame ukuhlasela inkukhu kanye lemvundla uma izilugu zingahlanzekanga.
“Silungise uhlobo lwesilugu lesi kulandela ukukhutshwa kogwalo lokuvuselela umnotho elizweni olweZim-Asset ngoba sifuna babe banengi abantu abangena kwezokulima,” kubika uMnu Mpofu.
“I-Battery Cage le ivumela amanzi ukuba adlule kuhle nxa inkukhu ziwafuna, yenze amaqanda angafi lula njalo adobheke lula,” kuphetha uMnu Mpofu.
