uMthunywa
INHLANGANISO ye National Aids Council (Nac) izenza umcimbi wayo weminyaka yonke wokunika intatheli izicoco koBulawayo ngoLwesine mhlaka 28 Nhlangula 2018. Lokhu kwenziwa nje ukuze kugqugquzelwe intathelizindaba ezivame ukuloba ngendaba eziphathelene legcikwane le HIV le Aids elizweni lonke jikelele, kanye lokukhuthaza ukuthi baqine ngokuhambisa ulwazi ngaleligcikwane. Umcimbi lo uyabe ungowesibili kulandela umcimbi wokuqala owenziwa ngomnyaka ophelileyo.
Intatheli zilomlandu obalulekileyo wokusabalalisa ulwazi olutsha, kungakho-ke kuqakathekile ukuthi intatheli zigqugquzelwe ukuze ziqhubeke zisakaza lokuloba ngobuciko langendlela efaneleyo ngokuphathelene legcikwane le HIV le Aids.
Selokhu igcikwane le HIV lavela okwakuqala eZimbabwe ngo1985, intatheli zisebenze ngamandla ekwaziseni abantu ngenguquko ezenzakalayo mayelana leHIV le Aids lasekukhuthazeni labo abaziphethe ongendlela engababeka engozini ukuthi batshintshe. Ngakwesinye isandla, i Nac yenza imihlangano yokufundisa intatheli labahleli kanye lokubazisa ngokutsha osekukhona ngendlela okuthathwa ngayo igcikwane le HIV.
Umcimbi lo uzakwenziwa kukhangelwe okwalotshwa kusukela ngenyanga kaZibandlela kusiya kunyanga ka Mpalakazi ngomnyaka ka 2017. Kuzakhangelwa isisindo, ukuqonda kolwazi kanye lokubaluleka kwemithetho lendlela okusetshenziswe ngayo ulimi.
Abanqobileyo bazahamba lemivuzo emihle, phakathi kwayo kulokuhanjiswa kumihlangano engaphandle kwelizwe ephathelene le HIV le Aids. Abaphathi abavela kugatsha lwe Ministry of Health and Child Care, abamele lezinye inhlanganiso ezehlukeneyo, abasakazi kanye labaphathi be Nac, lezisebenzi bakhangelelwe ukuba khona emcimbini lo.
Umphathintambo wogatsha lwe Health and Child Care, umhlonitshwa uDokotela David Parirenyatwa nguye ozabe ephethe lumcimbi njengumhlonitshwa.
Ngomnyaka ophelileyo, umvuzo wakuqala watholwa nguSharon Kavhu we The Southern Times. Wathola umvuzo wokuhanjiswa emhlanganweni we HIV Science owawuse lizweni le France, wona aphatheka kiwo okwamalanga amahlanu, isethifikhethi kanye lesicoco.
UTinomuda Chakanyuka we Sunday News wathola umvuzo wesibili yena owahanjiswa elizweni le Cote d’Ivoire ukuyephatheka emhlanganweni we Aids and STIs in Africa (Icasa) okwamalanga amahlanu, isicoco kanye lesethifikhethi.
Endaweni yesithathu kwaba ngu Mirirai Nsingo we H-Metro owamukela isicoco, isethifikhethi kanye le $850. INac yaphinde yanika i Zimpapers kanye le Zimbabwe Broadcasting Corporation ngokusabalalisa imibiko ngokuloba kanye lebulenjini, kwathi isititshi somsakazo se ZiFM sananzelelwa ngokusakaza kuhle.
