INac isifaka amakhondomu emabhawa

INac isifaka amakhondomu emabhawa

Isolated condoms

NguTumeliso Makhurane eseMasvingo
INHLANGANISO yeNational Aids Council isisungule uhlelo lokutholisa amajazi omkhwenyana emabhawa lasezindaweni zokuzithokozisa ngenjongo yokwehlisa ukumemetheka kwegcikwane lengculazi esigabeni seGutu.
Ekhuluma lentatheli ezivakatshele isiqinti lesi kuliviki uMnumzana Paska Mukuwe obona ngezenhlelo zokuxwayiswa ngomkhuhlane wengculazi kulesisigaba uthe uhlelo lolu selulamaviki amabili lusungulwe koGutu.

“Uhlelo lolu siluqale kumaviki amabili edluleyo koGutu lanxa ukufaka amakhondomu emagabheni sikuqale ngeviki ephelileyo.”

Amagabha amatsha asefakwe kulezindawo mane ngaphezu kwamanye amane njalo amadala. Igabha linye ngalinye lingena amakhondomu angu-600.

UMnu Mukuwe uthe uhlelo lolu kukhanya luyaphumelela nanko phela kuba lesiphithiphithi emabhawa abantu behahabela amakhondomu la.

Uthe sebananzelela ukuthi kwezinye indawo amakhondomu la ahamba ikakhulu nxa izisebenzi zikaHulumende ziholile.

Lanxa ethe bebengakacwayisisi ngokusetshenziswa kwamakhondomu la ubike ukuba balethemba ukuba abantu bawasebenzisa ngendlela efaneleyo ukuze kwehliswe inani labantu abaphila legcikwane lengculazi njalo kuvikelwe ukumemetheka kwemikhuhlane ethelelwana emacansini.

Abantu abatholakale emabhawa bakhalaze ngokuthi amakhondomu kawatholakali zonke izikhathi kukanti kulomunye undoda otshiye intatheli zingelamathe ngemva kokuthi yena ukhonona ngobuncane bamakhondomu ethi yena isitho sakhe sifuna amakhudlwana ngoba la akhona kuye ayadabuka.

Omunye omele abaphila ngokuthengisa ucansi eGutu, ozibiza ngelokuthi Gire nje kuphela, uthe yena labanye bakhe bebengakaze behlangane lendoda eswela ikhondomu eliyilingeneyo, okutshiye inengi labantu linyikinya amakhanda.

SIMILAR ARTICLES

NO COMMENTS

Leave a Reply