Uncategorized

Imvelo lempilakahle . . .Ukudla kungawakha umzimba kumbe kuwuwohloze

11 Oct, 2018 - 00:10 0 Views
Imvelo lempilakahle . . .Ukudla kungawakha umzimba kumbe kuwuwohloze

uMthunywa

SINGAKAQHUBEKELI phambili ngokuthunga injobo yethu, ngizathanda ukuthi kesihambe nyovane sikhangele ukuthi umumo womkhuhlane we-cholera umi njani, asisoze siyekele ukuba sithi singathi xoxiyani senze sikhumbuzana ukuthi umkhuhlane lo ukhona, ngakho kumele sinqineke singayekethisi.

Abadala babeqinisile bethi isalakutshelwa sibona ngomopho. Izinto zivame ukungasilungeli ngoba kucina sokuvela umopho, kuthi umopho ukhokhelele kogoqwa nyawo. Kulukhetho lwakho ukuthi ukhetha ukuthi ube lempilakahle kumbe hatshi.

Kule iviki sizakhangela ukudla, asisoze sixoxe ngokuthi okulomsoco yikuphi kumbe okungela msoco yikuphi. Sizakhangela ngokuthi kumele sikuthenge ngaphi ukuze sivikeleke emikhuhlaneni engabangelwa yikudla okungahlanzekanga. UHulumende kanye lamakhansili emadolobheni wonke kulemithetho ebona ngokuthi ukudla kumele kuphathwe njani. Ama-Environmental Health Technicians/Officers yibo abakhangela ukuthi imithetho le iyalandelwa.

Nxa umuntu ethole indawo lapho afuna ukulungisela ukudla kokuthengisela abantu kumele indawo yakhe ibe lamanzi aqandayo latshisayo, kube lendawo yokugezela izandla leyokugezisela izitsha, kumele umkulu wakhe ube lomphotshongo okhiphela intuthu lesikhudumezi phandle.

Kumele kube lezambuzi ezimbili kusiya phezulu ukuze ubulili bunye ngabunye buthole obaso isambuzi. Isambuzi sinye ngasinye kumele sibe lendawo yokugezela izandla.

Kumele kube lendawo lapho izisebenzi ezitshintshela khona izigqoko ngoba lezi abazisebenzisa bebamba ukudla kwabantu kumele zisale emsebenzini kuthi lokuwatshwa ziwatshelwe khona lapho. Akupheleli lapho kodwa kumele kube lendawo lapho izisebenzi eziphumula khona zisidla.

Nxa iyi-restaurant kumele kube lendawo lapho abantu abazabe behlala badle nxa bengathenga ukudla, kumele kube lendawo yokugeza izandla.

Nxa kuyi- (food factory) Take away akumelanga kube lendawo yokuthi abathengayo bahlale phansi. Njengoba nje ibizo lichaza ukuthi thatha uhambe ngakho kumele kube njalo ngoba indawo le ingalungiselwanga ukuthi abantu bahlale phansi badle. Izisebenzi ziyahlolwa minyaka yonke, ezisebenza kuzindawo eziqanjwe phezulu kanye lemabhutsha, lalapho okuphekwa izinkwa lezinye izindawo lapho ukudla kwakhona okuyabe kumanzi kumbe umthetho othi kumele zihlolwe.

Izithelo lembhida kumele lakho kuthengwe endaweni ezihlanzekileyo njalo ebantwini abawoda emakethi hatshi imbhida evela ezivandeni zedamu lika “O” eNjube kumbe ezifuleni zeCowdray Park ezigeleza ingcekeza yodwa. Ngake ngathi ngikhala ngokuthi izitishi ziyampompoza umakhelwane wami engangithenga kuye imbhida, wathi kibo kuyabathabisa ngoba imbhida yabo iyathola amanzi.

Kusukela lelolanga angiphindanga ngayathenga khona, ngoba lokhu kimi akulamahluko lokuthi umuntu ayele egabheli elilamanzi angene esivandeni sakhe athelele. Lokhu kuze kube nganeno ngoba phela amanzi aphuma ezititshini ayebe esehlangene lengcekeza yonke ongayicabanga, okubalisela imthambiso, amafinyela lemimcwado yabobaba esebenzileyo okunye ungazicabangela wena.

Inhlanzi lokunye ukudla okumanzi akuphuzi ukonakala, kodwa uthole impukane zibhuza abantu betshaye udwendwe bethenga emuntwini ongahlolwanga, ongela manzi okugeza izandla ozisiza egcekeni ngoba lapho akhona kungela sambuzi. Laba bantu babakhona nxa selitshona ilanga sebelesiqiniseko sokuba akusela Environmental Health Technician/Officer sebetshayisile.

Khona yikuthi bona laba abathengisayo bayakudla yini lokho kudla njalo nxa bangaze bathole imali abathengileyo bagule manje kusasa ngubani ozabe ezathenga. Asithengeni ukudla ezindaweni ezisemthethweni. Ungabona ukudla loba yinyama yehliswe intengo kakhulu loba kusendaweni esemthethweni limuka kukhona okutshaya amanzi, ungadingisisa awukusweli okungamanga kuhle ngokudla lokho. Nxa ulensolo ngokudla okuthile koBulawayo tshaya lezinombolo ezingabhadalwayo nxa usebenzisa ucingo olufanayo. TelOne 08004700, Econet 08084700.
l Joseph Mutemani Mangena EHO Bsc Hons in Public Health (Nust).

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds