uMthunywa
Silo Charles Dube – UJohn Mbabhadisi Ngubane kazwisisi nxa umalumakhe uCele emtshele ukuthi alande umkakhe ukuze azophelelisa ukuthokoza kwakhe. Lokhu kubangelwa yikuthi ngokwazi kwakhe sebachitha umtshado wabo loMaMthimkhulu ngakho-ke bangeze bathokoza behlezi bobabili.
UCele uyambuza umzukulu wakhe ukuthi wakewathokoza yini komasihlalisane bakhe? Akaze awuphendula lowo mbuzo uNgubane ngoba esazi kamhlophe ukuthi wavalelisa ngentokozo mhlazane efulathela umuzi wakhe eLa Lucia. UCele wasesithi: “John Mbabhadisi Ngubane, ngane kadadewethu, niphuma ebhodweni nizijikele emalangabini amalahle ngokushiya omkenu. Ayikho intokozo ngalena komshado wakho. Phuma uyobuza abantu abaningi laphaya phandle.
“Ayikho intokozo ngale kwesahlukaniso somshado. Isahlukaniso somshado kasikaze sibe likhambi, alona ikhambi futhi kasisoze saba likhambi nanini nanini. Isahlukaniso yisifo semindeni eseza nabeLungu njengoba bafika kuleli zwe nogcusula nophuzo lwezimbodlela. Izahlukaniso, ugcusula nezimbodlela yimibulalazwe. Bonke abaphambukela baduke ngale mibulalazwe bayiziwula.”
Iyamhlaba uMbabhadisi le nkulumo kamalumakhe abuze ukuthi wazi kanjani lokho umalumakhe yena engafundanga kakhulu, njalo waluthola kanjani lonke lolu lwazi lwakhe? UCele uphendula etshela uMbabhadisi ukuthi kulula lokho. Ukumesaba uNkulunkulu kuyikuqala kokuhlakanipha. Ngomusa woPhezukonke, uCele uthi yena wazithoba wafuna kuqala umbuso kaNkulunkulu lokulunga kwawo, kwasekusithi konke lokhu akubonayo kwengezwa kuye engelutho.
UCele utshela uJohn Mbabhadisi ukuthi uma evuka zonke insuku uyathandaza ethi, “Khuluma Nkosi, inceku yakho ilalele”. Uqhubekela phambili uCele etshela uNgubane ukuthi bona bazifunela okwabo kodwa, kabayingeni indaba yokuzithoba lokuthandaza. Uma beke bathandaza bathi, “Lalela Nkosi, inceku yakho iyakhuluma.” Konke ukwenza kwabo Mbabhadisi Ngubane kuyimbedumehlwane. UCele ubuza uJohn Mbabhadisi ukuthi wangena njani ukuba abe ngumkhangisi wombulalazwe, ubhiye? Uthi babembona emaphepheni loMaKhumalo bethi isidumbu sikayise saphenduka emathuneni sibona ingane yaso ikhangisa ngombulalalzwe.
Besaxoxa kanjalo uCele lo John Mbabhadisi kwangena uZaneqiniso owafika wathi uxolo mkhulu okhangisa ngobhiye, esitsho yena uJohn Mbabhadisi. Kusenjalo uZaneqiniso waphendukela kuNgubane embuza ethi, “Uzophuzani mkhulu owabhunguka? Awukho ubhiye lapha ekhaya. Umkhulu uthi ubhiye ngumbulalazwe. Nobaba nomama kabawufuni ubhiye. Bathi nezinja ziyawenyanya ubhiye, kaziwuphuzi. Sinokuqandayo kanye nokutshisayo. Uzophuzani wena mkhulu okhangisa ubhiye?”
Inkulumo le ivela kumntwana omncane, uZaneqiniso, ingane kaHlanganisani. Iveza ububi bukaJohn Mbabhadisi kodwa ehluleka ukuzivikela kubo ngoba eseyangekile. Ufela ngaphakathi yikho nje kuthiwa uZaneqiniso esekhulume kanje uvalo lwamgokloza wajuluka wabamanzi. Zehla nhlangothi zombili izithukuthuku. Wehluleka ukuphendula.
