uMthunywa
Nomthandazo Ndlovu
KUBEYISIPUNEPUNE sodwa abantu akade besesililweni sebebhabhathizwa ngamasese ngamadoda amabili abesilwa ebanga utshwala emfeni yelinye inina ebelile tshabhini elokitshini leMandava eZvishavane.
Lesi sibhewubhewu senzakale ngoLwesihlanu lweviki ephelileyo lapho uMnumzana Tofara Zimuto abambane khona lo Mnumzana Gilbert Moyo bebanga utshwala obebunathwa emfeni le.
Ekhuluma loMthunywa uNkosazana Fortunate Zhou owabona isisanasana lesi sisenzakala uthe wamangala ukuthi abantu sebengalwa bebanga utshwala emfeni.
“Umuyi uVimbai Moyo obedume ngebizo elithi Queen Vee ebesisemfeni yakhe ubeletshabhini ngakho abantu bathe kungcono bamvalelise ngokuzinathela njengoba laye ubengumuntu onathayo njalo letshabhini yakhe ibithandwa ngabantu okumangalisayo, lami ngizalwa nginje ngathola kuvele endlini yakhe kuyitshabhini edumileyo.
“UMoyo nguye obebona ngokuthi utshwala bunikwa njani abantu njalo kunguye obelezihluthulelo zalapho obebukhona. Indaba isuke lapho uZimuto sesithi kungani uMoyo enika abangane bakhe utshwala obunengi ngapho emthela ngabo ebusweni zahle zasukelana, abantu balamule sokungokunye lapha abantu sebefungelana,” kutsho uNkszn Zhou.
UMnu Moyo ebuzwa ngodaba lolu uthe uQueen Vee ubengumzawakhe ngakho ubengeke avumele abantu bezenzela umathanda emfeni yakhe.
“Kuliqiniso silwile sibili loTofara kodwa besingabangi utshwala, yena nguye obengasaziphathanga emfeni yomzawami sekhuluma izinto ezilihlazo ngoba vele ulomsindo engadakwa ngakho bengizama ukuthi ngikhulumisane laye yena wangithela ngotshwala,” kuchaza uMnu Zimuto.
UMthunywa ukhulumisane loEsther Moyo othe laba ababili batshengise ukungahloniphi unina ngokulwa emfeni yakhe.
“Ukulwa kwabobaba laba esililweni sikamama kwangizwisa ubuhlungu. Umama wayengumuntu othanda abantu engathandi ukulwa aluba uyaphila ubengeke avume ukuthi into enje yenzakale,” kuphetha uNkszn Moyo.
Imizamo yokukhulumisana loZimuto yehlule ngoba kala makhalekhukhwini.
