uMthunywa
Ethel Ncube
ZIMADOLONZIMA izakhamizi zakoSivalo eNkayi ngemva kokuba enye indoda ihlahlele enye ngehloka ekhanda kubangwa ingulube edle amazinyane omunye.
Isiga lesi senzakale kunyanga ephelileyo lapho uMnumzana Naison Ndiweni athi esiyabikela umetheswacala uDavid Mpofu ngengulube yakhe eyayidle amazinyane yatshiya inhloko wathi efika wamgongoda ngenduku andubana amhlahlele ngehloka kulokuthi axolise.
Esinye isakhamuzi esikhulume lentatheli kaMthunywa uMnumzana John Ndlovu uveze ukuthi indaba le itshwaqisa umzimba.
“Asazi sibili ukuthi umfana lo wangenwa yini aze ahlasele umuntu omdala kulokuthi bahlale phansi bakhulumisane.
“UNdiweni wadlelwa amazinyane akhe yingulube kaMpofu kwasala amakhanda kuphela. Ngakho wathwala amakhanda amazinyane esiyatshengisa umnikazi wengulube engazi ukuthi usezithezele olulenkume ngoba wathi efika ebikela uMpofu ngakho yena wamhlasela,” kubika uMnu Ndlovu.
Uqhubekele phambili echaza ukuthi uMnu Ndiweni wasila ngokulambisa.
“Ubaba lo bamtshiya esesimeni esibi kakhulu ngoba akwaziwa ukuthi sebemgamulile waqaleka isikhathi esinganani kodwa wenelisa ukuthi esephaphamile atotobe aye emzini wakhe. Kukhanya efika ngekhaya wayengasenelisi ukukhuluma bamgijimisela esibhedlela,” kubika uMnu Ndlovu.
Iphephandaba likazulu livakatshele esibhedlela seMpilo lapho uMnu Ndiweni alokhu elaliswe khona njalo ulokhu ephathekile kakhulu.
“Umnewethu kenelisi ukukhuluma, walimala kakhulu lanxa nje esesiba ngcono. Sisalinde ukuba kuhlanganiswe izimali ahlinzwe ukuze abengcono.
“Okunengi asilalwazi lakho, sisalinde ukuba enelise ukukhuluma ukuze asilandisele kuhle ukuthi kwahamba njani,” kubika elinye ilunga lemuli le elingathandanga ukuqanjwa ngebizo.
Ekhuluma lentatheli uNkosazana Khumalo ongunkosikazi kaMnu Ndiweni uveze ukuba baphakathi kobunzima njalo bazwa ubuhlungu ngokwenziwa ngumakhelwane wabo.
“Ubaba wathola amakhanda amazinyane ayetshiywe yingulube ewasa kumnikazi ekuhambeni kwakhe khonale yikho abafika bamgamula besithi uyadelela. Kambe singomakhelwane kwakunganani ukuthi njengoba ingulube zisonele aqale azwisise ukuthi kuhamba njani kodwa wabona kungcono ukuthi agamule.
“Sikhonapha sisesibhedlela abasincedisi ngalutho njalo akula loyedwa oyisihlobo sikametheswacala ofikayo ukuzobona ubaba, lokuthi unjani khathesi abakwazi,” kubika uNkszn Khumalo.
Intatheli ixhumane lenduna uEdwin Mahlangu oveze ukuba udaba olunjalo waluthola.
“Bangitshela ukuthi kulomuntu oganyuliweyo kodwa mina kusenzakala ngangingekho njalo angilalwazi kakhulu, engingakutsho yikuthi uNdiweni lokhe esesibhedlela,” kuphetha induna uMahlangu.
