uMthunywa
YiNtatheli kaMthunywa
IDOLOBHO leVictoria Falls lizakuba lesakhiwo sakulezinsuku esenkundla yemidlalo ezasetshenziswa kumincintiswano yezimota ebizwa ngokuthi yi-Grand Prix, kutsho uHulumende.
Iphephandaba likazulu lizwe lokhu ngesikhathi umphathintambo wezokwethekelelwa kuleli uPriscah Mupfumira egcizelela ukuba uHulumende ufuna ukuphakamisa idolobho leFolosi njengendlela engakaze ibonakale.
Kubikwa inkundla le ikhangelelwe ukuthi iqhube imijaho yezimota njengalokhu okwenziwa emazweni alempucuko. Ukwakhiwa kwenkundla ye-motorsport le sekukhweze inani lemincintiswano yaphezulu eqhutshelwa eFolosi ebalisa iVictoria Falls Marathon leKwese Victoria Falls Sevens rugby.
Ngomnyaka odluleyo inhlanganiso ephethe umdlalo wekhilikithi kuleli eyeZimbabwe Cricket yabika isifiso sayo sokuthi kube lenkundla yomdlalo wekhilikithi eFolosi. Isifo lesi asikagcwaliseki kodwa umphathintambo uMupfumira uthe kwamukelekile ukuthi iFolosi ithole inkundla ezinje.
UMupfumira uthe kulezipatsha zabosomabhizimusi ezathembisa ukuphosela imali zisebenzelana loHulumende ukuthi kwakhiwe inkundla le ngokuphangisa.
“Sitshisekela ukuphakamisa iVictoria Falls ibelidolobho elinikeza izethekeli zethu okunengi. Sifuna ukuphakamisa ukwethekelelwa kwezemidlalo ngoba sebekhona osomabhizimusi abafuna ukwakha lokubuyisa umdlalo we-motorsport eZimbabwe,” nguMupfumira lo ekhuluma eseFolosi ngempelaviki.
Umdlalo we-motorsport awuladumo kuleli loba nje zikhona inkundla koBulawayo laseHarare. Inengi labathandi balumdlalo lilolwazi olubanzi ngabadlali be-motorsport ababalisa uMichael Schumacher, Sebastian Vettel leFernando Alonso. Kungumbono kaMupfumira ukuthi inkundla yeFolosi ingakhiwa, kuzavela ithalenta kwabasakhulayo.
