uMthunywa
MAVIKI onke ngezimnandi zodwa elizethulelwa ngelikazulu nanko phela lakule iviki sidibanisa abalandeli bephepha lomhlabeleli wokholo uCollen Moyo.
Ofuna ukwazi ngalumhlabeleli nansi ingxoxo phakathi kwentatheli kaMthunywa uArnold Ndlovu (AN) lomhlabeleli lo, uCollen Moyo.
AN: Baba Moyo, ake usitshele ngamafitshane nje mayelana ngawe langomculo wakho.
CM: Mina nginguCollen Moyo umhlabeleli wokholo owangena endimeni le ngomnyaka ka1999 kuze kube lamhlanje ngingumhlabeleli wokholo. Ukuhlabela kwami ingoma zokholo kwabuya njengesipho esivela kuMdali njalo ngasebenzisa isipho lesi ukutshumayeza ilizwi lakhe emphakathini.
AN: Njengomuntu owaqala kudala ezomculo akutsho ukuthi usebenzisana labobani?
CM: Njengomuntu osemculweni kunzima ukuthi ungasebenzisani labantu, ngisebenzisana labantu abanengi, abahlabeleli kanye labantu abahlanganisa imisindo esihlabela phezu kwayo.
AN: Abantu bawamukela njani umculo wokholo, bayawuthakazelela yini?
CM: Abantu bayawuthanda umculo wokholo njalo uyamukelwa kakhulu, ngitsho lentsha isikhona elandela umculo lo kuphinde kube labasakhulayo asebefuna ukuba yingxenye yabahlabeleli bomculo lo.
AN: Kuhle nxa umculo lo uthakazelelwa kangaka, akutsho ujayele ukutshayela ngaphi umculo wakho njalo abantu bangalinxusela kuyiphi imicimbi?
CM: Mina njengomhlabeleli oseleminyaka sengahlabela endaweni ezinengi ezehlukeneyo zelizwe, ngaphinda ngahlabela langaphandle kwelizwe kakhulu eBotswana laseSouth Africa. Lonyaka sengize ngafika eEgypt ngomculo wami lo.
AN: Njengoba usuleminyaka emkhakheni lo sulamadlalade amangaki owawakhiphela abantu njalo lonyaka ubathembisani abalandeli bomculo?
CM: Kusukela ngiqala ezomculo sengakhipha amadlalade ayisikhombisa, kuthi lonyaka ngiphathekile ngokupheka idlalade lami lesi 8 elizabizwa Kalibongwe. Idlalade leli ngizalikhipha ngenyanga kaMfumfu njalo ingoma zonke ngizabe ngizihlanganise labahlabeli abatshiyeneyo abeZimbabwe labangaphandle kwelizwe.
AN: Bunzima bani elihlangana labo kwezomculo?
CM: Ubunzima obukhulu engihlangana labo yindaba yokuthengiswa kwezingoma ngoba ezikhathini ezinengi umculo wethu uthengiswa ngokungekho emthethweni njalo kuyasibulala njengabahlabeleli ngoba sicina singatholanga lutho.
AN: Nkuthazo bani ongayipha abahlabeleli?
CM: Engingakutsho yikuthi ukuba ngumhlabeleli kufuna ukuzinikela kakhulu lokusebenza gadalala.
