uMthunywa
Musa Janga
KULEMULI yeChipinge esigabeni seGwenzi eyanyamalalelwa ngumntwana kuminyaka emihlanu edluleyo elokhe ingelankani ngemva kokuba omunye umphurofethi ephendukise umntanabo okubikwa wathathwa ngesinye isalukazi sayamgcina egangeni.
Imuli kaTawanda Gwenzi ebisilahle ithemba lokuthi ingaphinda ibone umntanayo oseleminyaka yokuzalwa engu-12 ephila yehlise iphika kuviki ephelileyo ngemva kokuhlanganiswa lomntanayo ngumphurofethi uNhlanhla Ndlovu weGwanda.
Yiloba bejabulile ukubona umntwana lo owacatsha eleminyaka eyisikhombisa bakhathazekile ngendlela aziphatha ngayo nanko phela kubikwa uphila sanyamazana. Kubikwa umntwana lo udla inyama engaphekwanga kuphela njalo kasenelisi ukukhuluma okuzwakalayo.
Umphurofethi Ndlovu uthe yena labanye asebenza labo babizwa yimuli yakoGwenzi, eChipinge ukuze baxazulule ngokunyamalala komntwana okweminyaka emihlanu.
“Ngafonelwa yimuli le ingicela ukuthi ngizoyincedisa ukuze ithole ukuthi umntanayo engabe wafa kumbe uyaphila.
“Ngenelisa ukuyafika khonale ngoMgqibelo lomunye umfundisi.
“Ekufikeni kwethu sabikelwa ukuthi kulomntwana ongumfana owacatsha eleminyaka eyisikhombisa njalo sokuleminyaka emihlanu kwenzakala.
“Umntwana lo bathi walahleka eguswini esuke engumuntu oyaxotshela inkomo kasazange aphenduke. Ngemva kokuthandaza ngaboniswa ukuthi umntwana ulokhe esaphila njalo engekho khatshana okumangalisayo. Saphuma ijumo sibanengi sangena eguswini,” kutsho uNdlovu.
Uthe ngemva kokumdinga okwesikhathi bamthola ekhatshana okungaba ngamakhilomitha angu-24 usuka ngakibo.
“Ngatshengiswa ukuthi umntwana uphakathi kobhalu njalo lomuntu owamthathayo umgcina kuleyondawo. Umntwana lo ngamthola enqunu engcolile njalo engasenelisi ukukhuluma,” kutsho uNdlovu.
Uqhubekele phambili esithi umntwana lo wayengalahlekanga kodwa wayethethwe ngomunye ugogo esigabeni leso wamphendula umkhoba.
“Umntwana wayethethwe ngomunye ugogo walapho esigabeni okuthiwa nguGogo uZhou oyinyanga enkulu wamfaka ebhalwini ngoba efuna ukumenza umkhoba wakhe,” kulandisa uMnu Ndlovu.
Uthe kuleyondawo umntwana wayephiwa inyama eluhlaza eyenyamazana ezitshiyeneyo.
Ekhuluma lentatheli kaMthunywa uMnumzana Tawanda Gwenzi onguyise womntwana ubike ukuthi bajabule kakhulu behlangana lendodana yabo ebisileminyaka emihlanu yanyamalala.
“Besekwedlule iminyaka emihlanu umntanami wacatsha. Wacatsha eleminyaka eyisikhombisa khathesi seleminyaka engu-12.
“Kuminyaka le njengabazali bomntwana bekubuhlungu ukuphila ungazi lapho okulomntanakho khona ukuthi udleni, ugqokeni, ulobani. Besike sicabangele ukuthi mhlawumbe sowafa kodwa besingasuthiseki ngoba besifisa ukuthi aluba nje siyabona amathambo akhe nxa kuyikuthi sowafa.
“Emavikini edluleyo sizwe ngendumela kamphurofethi uNdlovu sasesimcela ukuthi azosiphathisa ukuxazulula lindaba elukhuni kangaka,” kutsho uMnu Gwenzi.
Uthe ngemva kokukhuleka kukaNdlovu umntwana uze watholakala.
“Umphurofethi uNdlovu wafika lapha wasitshela ukuthi umntwana uyaphila njalo usegangeni. Wathi siphume simdinge kodwa waze watholwa nguye ephakathi kobhalu.
“Umntwana lo kukhanya ubesetshenziswa ngoba ubengagqokanga njalo useziphatha sanyamazana. Kadli isitshwala kumbe okunye ukudla ngaphandle kwenyama eluhlaza.
“Kulezinsuku sesizama ukumfunza isitshwala kodwa lanxa esidla usidla nzima. Lokukhuluma kakhulumi okuzwakalayo loba nje sizama ukumfundisa.
“Umphurofethi wathi umntwana uzakuba ngcono ngokuya kwesikhathi lokuhlala labantu. Njengomdeni sithanda ukubonga umphurofethi ngokusisiza ngoba besesidubekile ngokudinga umntanethu.
“Amapholisa sawabikela ngokucatsha komntwana kodwa lawo adinga aze abeka phansi. Lamhla silokuthokoza ngoba indodana yethu iphendukile ekhaya,” kuphetha uMnu Gwenzi.
Isikhulumi samapholisa esabelweni seMatabeleland North uInspector Tavhiringa Kakohwa, uthe ufuna ukuqala azwe okwenzakala ngendaba le emapholiseni eChipinge.
