uMthunywa
Cornelius Luphahla
INKAMPANI yeSeed-Co isiqalisile ukukhuthaza abalimi ukuba balime amabele ikakhulu endaweni ezilezulu elincane ngoba engahlaselwa yibudli, aphanga avuthwe njalo eletha inzuzo enhle nxa umlimi angawathengisela amankampani apheka utshwala.
Ekhuluma lentatheli uMnumzana Social Shava onguAgronomist kule inkampani ubike ukuthi abalimi kufanele balime izilimo ezivuma endaweni abakhele kizo.
“Abalimi ikakhulu abahlala endaweni ezilezulu elincane kufanele balime amabele ukuze bathole isivuno esiphezulu noma izulu lililutshwane ngoba aphanga avuthwe,” kuchaza uMnu Shava.
Uqhubekele phambili wathi imihlobo yonke yamabele; amhlophe, labomvu, amade kanye lamafitshane enza umlimi athole isivuno esihle loba nje izulu liyabe lilincane.
“Amabele amafitshane amhlophe athiwa yitshwetha yiwo alesivuno esikhulu ngoba ayaxhakela ikakhulu nxa izulu lilinengi. Lokhu kwenza izikhwebu zakhona zande, okuyikho ukwanda kwesivuno sakhona.’’
Kubikwa amabele la athatha amalanga angaba ngu-90 ukuze avuthwe.
UMnu Shava uphinde walimukisa abalimi ngobudli obukhathaza abalimi nxa bethe balima amabele.
“Ubudli obuhlasela amabele la yimitshiphela lenyoni, kodwa inyoni yizo ezandise ukuhlasela kakhulu amabele amhlophe athiwa litshwetha, kukanti eminye imihlobo yamabele abomvu afana lesibhuku ahlaselwa yimitshiphela,’’ kutsho uMnu Shava.
Inkampani le ibuye yakhuthaza abalimi bamabele ukuthi bayenelisa ukuthengisa amabele abo abomvu kumankampani apheka utshwala agoqela iNgwebu Brewery kunye leChibuku.
UMnu Shava uphethe ngokuthi abalimi bamabele balakho ukuzitholela imali kanye lokudla kwezimuli zabo.
