uMthunywa
Nkosilathi Sibanda
KUZO zonke izikolo akula esedlula iMzilikazi High ngokukhipha ingcitshi zomdlalo kanobhutshuzwayo, kutsho inkampani yeCoca-Cola.
Inkampani le yiyo esekela inkezo edume umhlaba wonke eyeCopa Coca-Cola eyaqala ukudlalwa eZimbabwe ngo1989. Ngalowo mnyaka, iMzilikazi High yabayintshantshu yazo zonke izikolo idlalelwa nguPeter Ndlovu.
Ukuphumelela kweMzilikazi High kunconywe yiziphathamandla zemidlalo kumkhosi wokubonisa inkezo yeCopa Coca-Cola kubafundi balesi isikolo ngoLwesithathu.
IMzilikazi High, kusukela ithwala inkezo le ngo1989 isihwatshe abadlali abasuke kulesi isikolo baqhubeka bephumelela ngenguqu. Isikolo lesi sesathwala iCopa Coca-Cola kane, ngo1989, 1993, 1999 lango-2001.
Kuyo yonke iminyaka le, amaqembu la ayengaphansi kukamphathisikolo wodumo uBenjamin Chiromo.
Mhla ibizwa njengentshantshu ngo1989, koBulawayo, iMzilikazi High yaphiwa inkezo ngumuyi uJoshua
Mqabuko Nyongolo Nkomo owayenguMsekeli kaMongameli welizwe.
Abadlali abalolonga ithalenta eMzilikazi bayedlula ikhulu. Umphathisikolo uBhekokuhle Dube uqambe inengi lalabo abadla ubhedu labasalikhaba okwamanje babalisa uNsukuzonke, Gift Lunga Jr, Mkhokheli Dube, Castro Ndebele, Johannes Ngodzo, Teenage Hadebe, Lawrence Mhlanga, Kudakwashe Mahachi, Joel Ngodzo, Andrew Mbeba, Godfrey Makaruse, Charlton Siamalonga, Kelvin loElvis Moyo labanye asebatshiya inguqu benza okunye.
UDube ubike ukuba bazizwa bezingqwele nxa besethekelelwa yinkampani yeCoca-Cola eze lenkezo.
“Inkezo iphendukile ekhaya layo lapha eMzilikazi High School. Sizizwa siqakatheke kakhulu ukuphiwa isikhathi esinje sokuthi sikhumbuzane ukuba inkezo le yaqala ukuphathwa yisikolo sethu.
“Banengi abadlali abaphuma ezandleni zethu kodwa ngithanda ukubonga bonke abaphathi ikakhulu ubaba uChiromo ngokunqoba kwakhe inkezo le kane, asikhohlwa lababalisi abazinikela ngaso sonke isikhathi ukuthi bafundise abantwana ezemidlalo. Sibonga leCoca-Cola ngokunikeza abantwana ithuba lokuthi babonakalise ithalenta abalalo kumdlalo wenguqu. IMzilikazi High izahlala iziqhenya ngalokhu,” kutsho uDube.
Isiphathamandla seCoca-Cola uVee Chibanda ukhuthaze abafundi ukuthi loba bezaqinela ukudlala inguqu, bengalibali ukubala ingwalo.
Ngaphandle kokubonga isikolo ngokunqoba kwaso iCopa Coca-Cola, uChibanda uphathele isikolo ingwalo zezifundo ezitshiyeneyo.
“Okwenziwa yiMzilikazi High ngo-1989 kuyasiphakamisa lathi njengabasekeli beCopa Coca-Cola. Inkezo le yaqala ukuncintiselwa eZimbabwe emhlabeni wonke okutsho ukuba iMzilikazi High yintshantshu yakuqala yalinkezo.
“Ngithanda ukukhuthaza abadlali ukuba izifundo lazo ziqakathekile. Ungabe ungumdlali wenguqu kodwa yazi ukuba ingwalo zingakuhambisa indawo ezinengi, zikuvulele lamathuba okuphila impilo oyifunayo,” kutsho uChibanda.
Kusenjalo, umncintiswano walonyaka uyaqhubeka mhlaka 24 kulinyanga lapho okuzahlangana intshantshu zezigaba zakoBulawayo kudingwa isikolo esizamela isabelo.
Imidlalo yokucina, edibanisa intshantshu zezabelo izaqhutshelwa edolobheni leZvishavane.
