uMthunywa
Gladmore Ncube
ABEBUTHO lesizwe abakhangela ngokugcinwa kwemfihlo ukuze ingafinyeleli ezandleni zezitha sebekhuthazwe ukuthi benze umsebenzi lo ngobuqotho njalo bahlale beqaphele izikhathi zonke.
Inkuthazo le ivele kuBrigadier General Augustine Chipwere ngoLwesihlanu ngesikhathi kuqeqetshwa amabutho angu-55 aqeqetshwa esikolo seZimbabwe National Army School of Signals.
Amabutho yibo abagcini bokuthula elizweni ngalokho bayalinda ukuthi laba abaphikisana loHulumende bangenzi lutho olungabangela ukuthi kube lezinkinga eziphambanisa ukuthula elizweni.
UBrig Gen Chipwere uthe ukuze ibutho liphumelele empini kumele libe lilendlela zokukhulumisana ezihambelana lokuguquka kwe-technology.
“Ibutho eliphumelelayo empini ngelilezindlela zokukhulumisana ezithuthukileyo njalo elilemfihlo zalo ezigcinwe kuhle ukuze isitha singazi amaqhinga alo eliwasebenzisayo.
“Sinika labo abaqeqetshayo ingqobe yokuthi basebenzise ukukhalipha kwabo ekuvikeleni imfihlo yelizwe eqakathekileyo ukuze ingalahleki,” kuphetha uBrig Gen Chipwere.
UBrig Gen Chipwere ukhuthaze abafundi laba ukuthi bahlale beqaphele njalo balinde imfihlo yesizwe ebulenjini.
Kubikwa kuzifundo lezi bafundiswe ukwenza izigxingimazwi ezibapha imvumo yokuxoxa bezwana bona bodwa kungela omunye umuntu ongabalalela ngokungekho emthethweni.
Lezi zigxingimazwi yizo abazisebenzisayo nxa besempini becebisana kumbe bedingana.
