uMthunywa
NguMsilisi Dube
INHLANGANISO yeGrainmed Agricultural Medical Aid Society (Gamas) ikhuthaza abalimi ukuba bangene kuma-medical aid schemes ukuze baqhube kuhle imisebenzi yabo yokulima.Kubikwa abalimi abanengi abavamanga ukungena kuma-medical aid schemes okucina kubangela ukuba bengaqhubi kuhle inhlelo zabo zokulima nxa bengahlatshwa ngumkhuhlane.
UMnumzana Jabulani Dlakama onguye okhangele nge-medical aid le, uthe uyakholwa ukuba uhlelo lolu luzaphathisa abalimi nxa sebethe behlelwa zinhlupho ngesikhathi sokulima.
“Sasungula uhlelo olubizwa ngokuthi Umlimi/ Murimi Farm Medical Aid Scheme, okuluhlelo lokulondoloza impilakahle yabalimi. Sinanzelele ukuthi umlimi olempilakahle enhle nguye ozuza isivuno esiphezulu.
“I-medical aid le ilemikhakha emithathu, sile scheme yabalimi abalima indawo enkulu yona elezigaba ezimbili, i-Platinum package le-Diamond package.
“Kuzokuba lohlelo lwabalimi abaphakathi laphakathi kokuba ngabalimi abakhulu lokuba ngabalimi abancane olulemihlobo emibili njalo, i-Gold Package le Silver Package lohlelo lwabalimi abancane i-Bronze Package.
Kungakho umlimi uyenelisa ukungena kuhlelo oluvumelana lesikhwama sakhe,” kutsho uMnu Dlakama.
Kubikwa abalimi balakho ukungena ku-medical aid le besebenzisa inhlanganiso zabo kumbe bafike emahofisini eGrainmed Agricultural Medical Aid Society, wona atholakala endaweni ezitshiyeneyo kuzabelo zelizwe.
Omunye umlimi uNkosikazi Eunice Mpofu olima eseSigodini uveze injabulo enkulu ngohlelo lokulondoloza impilakahle yabo njengabalimi.
“IGamas isibumbele uhlelo oluhle kakhulu thina abalimi, siyabonga ngoba sesizasebenza siqinile sisazi ukuthi mhla singaphathekanga kuhle emzimbeni silakho ukuthi siyekwelatshwa esibhedlela sisebenzisa i-medical aid yethu le,” kuchaza uNkkz Mpofu.
