uMthunywa
NguLungelo Ndhlovu
UMNCINDEZELI wenkondlo kanye lokuphekwa kwamafilimu, eMakhosi, uMlamuli Moyo, usekhuthaze imbongi zakoBulawayo kanye labalobi ukuthi bazobukisa imisebenzi yabo enkundleni ye-Amakhosi.
UMoyo uveze lokhu ngesikhathi evakatshele emawofisini kaMthunywa.
“Ngithanda ukukhuthaza imbongi kanye labalobi bengwalo ukuthi bangasaleli, kababuye eMakhosi, bazobukisa imidlalo yabo,” kutsho uMoyo.
Imidlalo yePoetic Dreams iqhutshwa minyaka yonke kunyanga kaMbimbitho, okwamalanga alitshumi lane, njalo imbongi ezehlukeneyo kanye labalobi bengwalo bayabe betshengisa ubuciko babo emncintiswaneni lo.
“Umncintiswano walonyaka wehlukile ngoba sisebenzisana labantu abanengi, abazasekela abalobi ukuthi bancindezele ingwalo zabo zicine sezibalwa.
Sizafaka ezinye ebulenjini kuthi imbongi eziyisithupha ezizanqoba emncintiswaneni lo zizathola izithupha njalo lemisebenzi yazo ibukiswe lapha eMakhosi ukuze baziwe,” kuqhuba uMoyo.
Ubike njalo ukuthi imbongi sezilakho ukubhalisa ukuze zingene emncintiswaneni lo, kuze kuyefika mhlaka 22 wayonale inyanga njalo bazahlala umhlangano wabo wakuqala kulimpelaviki.
Kuzwakale ukuthi sokulembongi ezilitshumi lanhlanu esezibhalisile kumncintiswano wePoetic Dreams ezibalisela uVodloza, Young Slizer, Mazilankatha kanye labanye njalo ezinye imbongi ezilesifiso sokuncintisa lapha zilakho ukuza eMakhosi ukuzozizwela ngokugcweleyo mayelana lomncintiswano.
