uMthunywa
YiNtatheli kaMthunywa
INHLANGANISO ephethe umdlalo we-basketball kuleli ibika ukuba isizamile ukusondeza umdlalo lo duzane labantu ngokusabalalisa inhlelo zayo lasemaphandleni.
Umdlalo lo ulodumo emadolobheni kuphela kodwa umongameli weBasketball Union of Zimbabwe uJoe Mujuru uthe akumelanga kube njalo.
“Akula mdlalo okuthiwa ngowemadolobheni kuphela, yikho ngemva kokunanzelela ukuthi siyasilela emaphandleni, sesicabange ukuthi siqine kakhulu kundawo ezingaphandle kwamadolobho.
“Inhlelo zethu zokusabalalisa umdlalo ziqale kuminyaka emithathu edluleyo lapho esedlula khona emadolobheni amancinyane abalisa iPlumtree leHwange.
“Kungumbono wethu kuBasketball Union of Zimbabwe ukuthi umdlalo angeke uthole ithalenta elitsha ngaphandle kokuthi sifinyelele zonke indawo,” kutsho uMujuru ngoLwesibili eseHarare.
Esabelweni seMatabeleland North, idolobho leHwange liyakhokhela kwezokuqoqwa kweligi ehlanganisa amaqembu akulindawo, eDete, eLupane laseFolosi.
Ekhuluma loMthunywa, umgcinishlalo walumdlalo eMat North uPenrick Ndlovu uthe inhlelo zeBUZ ziyancomeka.
“Umdlalo we-basketball usuthola usekelo kancane kancane kulindawo ngoba sekulabantu abawulandelayo.
Konke lokhu kungenxa yemzamo yeBasketball Union of Zimbabwe eyokufikisa imidlalo endaweni ezikhatshana lamadolobho amakhulu.
“Lapha eMat North sesilamaqembu ayedlula itshumi aphatheka kuligi yethu. Sikhangelele ukuthola amatsha aphuma eFolosi njalo.”
Inhlanganiso yeBUZ ibika ukuthi nxa ingathola usekelo kumathimu asemaphandleni, izazama ukudinga amabhola lamambule kanye lokucentwa kwehlathi lapho okuzakhiwa khona inkundla.
