uMthunywa
YiNtatheli kaMthunywa
KUSUKELA ngesizini ezayo akulamdlali wenguqu ozavuma ukungena enkundleni nxa engaphiwanga iholo lakhe eligcweleyo.
Lesi yisinqumo esizaphaphamisa inkokheli zamathimu enguqu eziqilibizela abadlali ukuthi badlale kodwa basuke bengasigcini isivumelwano sabo.
UMthunywa uzwe ukuba ngomnyaka omutsha, inhlanganiso emela amalungulelo abadlali benguqu iFootball Union of Zimbabwe (iFUZ) izethula umbiko lo kumaqembu akumaligi wonke.
“Okwenza abadlali bethu bavume ukuqilwa yikuthi bayabe bedinga umsebenzi njalo befuna ukubonakalisa ithalenta labo. Esesikunanzelele yikuthi kulezinye inkonkeli ezikhohlisa abadlali. Kuyathenjiswa ukuthi imali yokudlala izabhadalwa, ikanti akulamali ezakhitshwa.
“Ngokunjalo, amathimu wonke azathola umbiko wethu wokuthi ngo2016 akulandelwe imithetho, kube lokwethembana. Abadlali asifuni ukuthi baqoqode emahofisini bekhala ngokuqilwa iholo labo.
“Nxa kusenza, sithi kungadlalwa ibhola nxa imali yomdlali kungacaci ukuthi izakhitshwa,” kutsho inkokheli yeFUZ uDesmond Maringwa.
UMaringwa uthe ngokubikela amathimu lokhu, umlandu wabo ngowokuthi babumbe ubudlelwano obuhle phakathi kwabadlali lamathimu abo.
I-FUZ ikhuluma kanje ngesikhathi amathimu ephathekile ngokudinga abadlali abatsha besizini ka2016.
“Inhloso yethu ayisikho ukwethusela. Bakhona abazakuthi iFUZ isitshela amathimu okokwenza. Okumqoka lapha yikuzwisisa ukuthi umdlali webhola yisisebenzi. Ukwenza isivumelwano lezithembiso ezigcwalisekayo yikho esihamba ngakho.”
