uMthunywa
Nkosilathi Sibanda
KUZE kwavela ukuthi iqembu leKhaya Arts lilobuciko baphezulu kwezomgido yesiNtu koBulawayo nanko phela liphume libhuqe wonke amaqembu kumkhosi weChibuku Neshamwari ngoMgqibelo.
IKhaya Arts izamela isabelo sakoBulawayo sekudingwa intshantshu yelizwe edolobheni leMutare mhlaka 4 Ncwabakazi.
Imincintiswano yeChibuku Neshamwari iqoqwa yinkampani yeDelta Beverages eyiyo epheka utshwala beChibuku.
Bekugodola mhla womncintiswano ebhawa yakoPhekiwe elokitshini leNkulumane kodwa kuthe kungena iKhaya Arts kwaba lesikhudumezi, lababukeli batshombuluka bawuzwa umgido wesiNtu.
Amalunga eKhaya Arts agide isitshikitsha ngendlela engakaze ibonakale batshayelwa izandla ngomdumo ophezulu. Ngokunqoba kwalo, leliqembu liphiwe i$500.
Umkhokheli walo uFuture Dube uthe besiside isikhathi belinde ukutshengisa ukuba yibo ingqwele zomgido wesiNtu.
“Sithabe asizazi silapha ngemva kokubizwa njengentshantshu zomgido. Sisebenze nzima kusukela umnyaka uqalisa, sizimisele ukufikisa lesi isigaba. Asizitshayi isifuba ngoba umncintiswano lo ubungelula,” kutsho uDube.
Amanye amaqembu adlale kuhle abalisa iBambanani Women’s Ensemble ephume ikunombolo yesibili yanikezwa i$200. Iqembu leMvimbi Arts elaziwa ngokutshikitsha kuthunqe uthuli liphethe likunombolo yesithathu lile-$150.
Bekungeke kwathiwa kulomncintiswano kungela maqembu eJaiva Traditional Group, iThandanani Women’s Ensemble leBlack Tigers.
Imigido yeChibuku Neshamwari iqoqwa njalo layinhlanganiso yeNational Arts Council of Zimbabwe (NACZ). Abameli balinhlanganiso koBulawayo babike ukuba lonyaka bekufiwa esitikini.
Ekhulumela iNACZ uWilliam Nyandoro uthe okuhle kuyabukwa.
“Iminyaka leminyaka sihlala sibona imigido etshiyeneyo esitshiya sijabula kodwa okwalonyaka bekuphezulu. Wonke amaqembu aphakamise isisindo somncintiswano, siyakubongela lokhu.
“Isibongo esikhulu siya kuzakhamizi zakoBulawayo eziqinisele umqando obubambe idolobho ngempelaviki. Usekelo lwazo aluqhubekele phambili ngoba kutshengisa ukuba imigido yemvelo iyaphambili,” kutsho uNyandoro odume njengengcitshi kwezemidlalo.
Ngomnyaka odluleyo kwanqoba iqembu leZimnyama Dance Ensemble eyaphinda yathatha inkezo ngokunqoba wonke kumncintiswano wezabelo.
