uMthunywa
YiNtatheli kaMthunywa
KUBE nguMvulo obomvu kulabo abazi ibhola likanobhutshuzwayo okweqiniso!
UPhilip Chiyangwa, umongameli weZimbabwe Football Association (Zifa) uvuse ulaka lwabalandeli benguqu ngesinqumo asithethe mayelana lomdlalo phakathi kwe Bosso le Dynamos.
NgeSonto langoMvulo uChiyangwa uzehlise isithunzi phambili komphakathi obukholelwa ukuthi inkokheli le isiguqukile kukanti iyaphambili ngokufuna ukudida abantu.
Ulahlekelwe yisithunzi ngokulandela ikhasi elibomvu elaphiwa umdlali weDynamos uChristian Eupopa Ntouba ngunompembe owayephethe umdlalo weDynamos leHighlanders uArnold Ncube.
Umdlali weDeMbare lo wangqikila imvimbi yeBosso uPeter Muduhwa, okuyikho okwamxotshisa emdlalweni.
“Kulandela ukuhlolisisa umdlalo lamalunga ekomithi yabonompembe uChiyangwa usethethe isinqumo sokwesula ikhasi elibomvu elinikezwe umdlali weDynamos uChristian Eupopa Ntouba . . . ,” kutsho umbiko okhitshwe yiZifa ngoMvulo ekuseni.
Insindabaphenduli le yengeze inzondano phakathi kwabalandeli beDynamos leHighlanders.
Andubana uChiyangwa enze okwakhe, amaqembu womabili ebesekhohlwe akhumisana umlotha.
Okusegcekeni kuwo wonke umuntu yikuthi uChiyangwa uvuse ezileleyo, waqala umvukela.
Umvukela lo yikulwa kwabalandeli bomdlalo enkundleni lokuxabana kwabadlali sekubaliswa ukuthi ubani uphuma kuqembu lawuphi umhlubulo.
Pho yiliphi iqembu kuligi yeCastle Lager elizavuma isinqumo sikanompembe nxa iDynamos iphathwa njengeqanda?
Iphephandaba likazulu lingene ezitaladeni zakoBulawayo laxoxisana labathandi labalandeli bamaqembu atshiyeneyo ngombono wabo ngoChiyangwa.
Okuvele kuqala yikuthi inengi liyamsola uChiyangwa.
“UChiyangwa ungenele izinto engelalwazi ngazo. Ngumbhedo lo owenzileyo,” nguNtontobeko Ncube lo osekela iBosso.
Umsekeli wodumo kuqembu elifanayo uTeekay ubikele uMthunywa ukuba kungangcono ilizwe liqunywe, kubeleligi entsha ezadlalelwa ngamaqembu akumhlubulo engezansi yelizwe.
“Kungehlulani ukuthi siqale ukudlalela iligi yamaqembu aphuma ezansi yelizwe. UChiyangwa labanye bakhe esingeke sabaqamba ngamabizo balenjongo yokudiliza umdlalo wenguqu, ikakhulu iHighlanders. Ngumkhokheli onjani oxabanisa abantu emdlalweni?
“Okungcono yikuthi yena uChiyangwa akhitshwe kulikomithi yabonompembe. Abakhokheli bethu abafunde ukuthi abavunyelwa ukuphumela egcekeni ngamaqembu abawasekelayo. Lihlazo elenziwe nguChiyangwa, laye uyakwazi lokho.”
AmazweikaTeekay ahambelana lombono kaMemory Mucherahowa owake wadlalela iDynamos.
Ebika ebulenjini bukaFacebook, uMucherahohwa uthe: “Lowo othe ikhasi elibomvu lesulwe ubulala iDynamos aphinde abulale lomdlalo wenguqu kanye labadlali abasakhulayo kuleliqembu.”
Usaziwayo kwezokusakaza uEzra Tshisa Sibanda kazange athatha isikhathi echothoza inyathelo likaChiyangwa.
“Akusela nguqu la, sekugcwele umoya wenzondo lobudlwangudwangu. Isinqumo sikaChiyangwa sibulala inguqu.
“Ingatsha zeZifa okumele zikhiphe umbono wazo kutsho ukuba zisebenza ngensitha langobunzima . . . Akulankokheli lapho, akulakuqoqeka. IZifa efanayo kayizange yenze lutho ngokwenzakala mhla iHighlanders idlala leDynamos eBarbourfields.
“Kungani kugijinyiswa okweDynamos kuphela?. Chiyangwa ubusebenza kuhle ngamaqembu esizwe kodwa usubuya ungcolisa inguqu kuleli.Loba iDeMbare uyithanda, kwenze lokho ukhokhela inguqu ngendlela efaneleyo . . . Amaqembu wonke akuPSL awabambane, engavumi ukudlala.”
