uMthunywa
Silo Cornelius Luphahla
MTHWAKAZI omuhle, wena ondlela zimhlophe, buphi ubuntu bakho kanye lobuzwe bakho nxa usamukela wonke amasiko aguguda ubuzwe bakho? Angithi nje kuthiwa isizwe yisizwe ngenxa yamasiko aso, pho lesi esakoMthwakazi yisizwe bani esesalahla amasiko aso saqaga awezinye izizwe sawenza awaso? Babeqinisile sibili oMandulo ukuthi okungapheliyo kuyahlola, emhlabeni kusinwa kudedelwana. Nanku sikubona ngamehlo ayatshabalala amasiko kaMthwakazi.
Kambe lani nkokheli kwezamasiko likukhangele na osokusenzakala lapha koMthwakazi? Nxa likukhangele lithini ngakho? Uthola abantwana ezikolweni begida umgido othiwa yiJerusalema Mbende angazi ukuthi umgido lo wavela ngaphi njalo utshoni. Noma nje bethi izinto ziyaguquka abatsho lokhu okwenzakala koMthwakazi ngoba akuseyikuguquka sokuyikugugudeka.
Ekadeni besisazi isitshikitsha sokumekeza, esomendiso, esezangoma kanye leminye imigido efana lamajukwa kodwa khathesi abantwana sebefundiswa iJerusalema into ebingekho izolo. Angithi abantwana laba yibo insika yesizwe, pho nxa bezafunda iJerusalema angithi bazafundisa abantwababo yona Jerusalema leyo kuhle kube yikutshabalala kwemigido yakoMthwakazi okuyikutshabalala kwesiko. Mthwakazi kaNdaba phaphama uvuselele awakho amasiko.
Ekadeni besisazi isitshikitsha sokumekeza kodwa besingagidwa ngabantwana abancane, besigidwa ngamantombazana asekhulile. Isimanga yikuthi iJerusalema le igidwa ngabantwana kodwa ifanele amantombazana esekhulile. Kambe nxa umntwana oyinkazana engagida ehlangabezana lomfana beze beyothintana bethuzane kugenqukwe kungabe kubafundisani njengabantwana? Angithi yikubalola ukuthi benze ukuganga nje? Yikho abantwana bakhathesi bengamahlongandlebe ngoba basuka bakufundele ekugideni lokhu. Mthwakazi omuhle hlolisisa umhlobo womgido lo ubone ngoba uyingozi enkulu ebantwaneni.
Angithi endulo nxa babethi isitshikitsha sokumekeza sigidwe ngamantombazana lamajaha asekhulile babesazi ukuthi bajongeni nje. Babengaboni ngalihlo linye okothekwane. Lokhu kwakuzindlela zokubafundisa ukumekeza lokuthi amajaha azikhethele osomoya babo ngemva kokukhangwa yikumekeza lokhu. Pho iJerusalema le angithi izakhanga abantwana ukuthi bazibone sebengenelisa ukuba labosomoya bona besaphuma uchago emakhaleni nje njengoba isimekezo lesi sasingummemandoda.
Ngiyadana ngoba kukhanya uthango ludla amakhomane koMthwakazi njalo sokukompunzi idla emini iswele longayethusa. Nanku phela umuntu engathutsha lesiko lakhe noma lingeliphambanisa ubuntu bethu lisuka lamukelwe kungabi ndaba zalutho. Kasize uMvelinqangi angenele koMthwakazi ngoba isizwe sesiphenduke ingqukumbane umdlwane ongakathungululi, intundu kaSobukhazi singumfana.
Mthwakazi omuhle, amathole akhethwa kusakhanya, ibumba lithatshwa lisemanzi njalo inyoni zibanjwa zisemaphuphu, ngakho zamani ukulungisa izinto kusasemasinya lidele amasiko la eyimfundiso embi ebantwaneni. Nkokheli kwezamasiko hlolani amasiko afikayo andubana liwamukela ngoba lizangenisa ingwendela koMthwakazi iqothule isizwe sonke.
