IFlying Stars ijwamula inkezo

05 Jul, 2018 - 00:07 0 Views
IFlying Stars ijwamula inkezo IFlying Stars

uMthunywa

Nkosilodumo Ndebele
NJENGOBA iligi yenguqu ehlanganisa amaqembu okholo koBulawayo isisondela esikhathini sokuthi ithathe ikhefu, amaqembu asencintisana ukuthi aqede ingxenye yakuqala yesizini elamaphuzu aphezulu kuligi.

Iqembu elibizwa ngokuthi yiFlying Stars yilo eseligijima ngesikhulu isiqubu ukuze lenelise ukutshiya iqembu lebandla elizibiza ngokuthi yiSpirit Filled Ministries.

ISpirit Filled Ministries isilemiklomelo eyi-23, ilandelwa yiFlying Stars eza ngesombane isiqubu ngamaphuzu ayi-21.

ISpirit Filled Ministries ibingakaze idliwe lokhe iligi yasungula imidlalo yayo ekuqaleni komnyaka, kodwa baqinisile abadala nxa bethi okungapheliyo kuyahlola njengoba inqotshwe yiRising Stars kumpelaviki edluleyo.

Umkhokheli weqembu leFlying Stars uEvans Madhuku uthe bayayifuna inkezo.

“Sesigijimela ukuthi sibe phezulu kulamanye amaqembu amanye amabandla ikhefu lengxenye yesizini yokuqala lingakafiki. Iqembu lethu alikaze lithathe inkezo lokhe iligi le yasungulwa.”

“Thina leSangano Legends siyingxenye yalaba abasungula iligi le, kungakho sikubona kufanele ukuthi sidle izithukuthuku zethu ngokuthi sinqobe kulisizini. Sifuna ukuhle sibe phezulu kwamanye amaqembu ingxenye yesizini yokuqala ingakafiki,” kutsho uMadhuku.

ISpirit Filled Ministries ithe izazama ngazo zonke indlela ukuthi ibulale amaphupho eFlying Stars okubajwamulela inkezo yona sebeyiphethe ngesandla.

“Sizimisele lathi ukuthwala amahawu lemikhonto ukuze sivikele isikhundla sethu sokuba yinkosi yengxenye yokuqala yesizini. Asisoze sibekele basijwamulele inkezo lula,” kutsho umkhokheli weSpirit Filled Ministries uFarai Munago.

“Iqembu lethu libeyingxenye yale iligi lonyaka sahle sandiza emoyeni. Sifuna amanye amaqembu abekwazi ukuthi asilandanga ukuzogcwalisa inani kuligi ngenxa yokuthi sibatsha, kodwa silande ukuzokulwa njengawo wonke amadoda empini,” kuqhubeka uMunago.

IRising Stars layo exokozela ngamaphuzu ayi-19 kukhanya layo ithembisa ukuthi izaqeda ingxenye yezingqungqulu kumaqembu adlala kuligi yenguqu yamabandla akoBulawayo lonyaka.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds